Akahakūö Öm?
Kūö yòh ök Rācha Tāvit nö kē yik kumyung aṅ tahëng panam?
ŌT YIK tarik alaha Tāvit kumyung tö tahëngö pumnāmö, tö sā Sēlek aṅ Amön, Urayā aṅ Hītait ngaich Itma inrē aṅ Mô-ap. a (1 Kin. 11:39, 41, 46) Ōt yik tarik alaha ò kumyung ‘aṅ Yĕrit, aṅ Pēlet, hēk aṅ Kitit inrē.’ (2 Sa. 15:18) Rö-ö pön Filistain yik tarik aṅ Kitit. (Yôs. 13:2, 3; 1 Sa. 6:17, 18) Ngaich in e mikahlōn inrē ayī-ö tö yik aṅ Yěrit hēk aṅ Pēlet nö hol yik aṅ Filistain.—Isi. 25:16.
Kūö yòh ök Rācha Tāvit nö kē tarik alahare tö yik kumyung aṅ tahëng panam? Pön tö chiplö cha-a nö in ò, möthē nö in ngam Tēv Yāvē. In ngam tiksönörī ngam Paipöl nö vënyu inlahen yik aṅ Yěrit hēk aṅ Pēlet nö ngö inlahen: “Holṙen Tāvit cha-a hē ṙētak nuk kanihngen ò nö römöng hayöng.” (Tö Niū Intörpritörs Tiksönörī Òf Tö Paipöl) Sitih inlahen cha-a nö hameuktöre nö chiplö nö in Tāvit? Hěng tak ök umuh ‘tarik sāṙen ök töminënyu tö Sepā,’ lamā-al Tāvit. Hē e yik ‘tarik aṅ Israel’ nö ṙāngen Tāvit nö tömrit Sepā. Hö-ö pöri yik aṅ Yěrit hēk aṅ Pēlet nö ṙāngen Tāvit, hayööken Tāvit inrē cha-a nö keuheūtngö ngam lina-alkūö nö ihôi cha tö Sepā. (2 Sa. 20:1, 2, 7) Hěngheuh hēk cha-a nö hameuktö ngam chaniplöre nö in ò. Hěngheuh ök kūön ök Rācha Tāvit ang Atōniyā nö kēngen ngam inyööngö tö ò. Ngaich hayööken Tāvit yik aṅ Yěrik hēk tö yik aṅ Pēlet nö vīlen Sòlòmön nö Rācha, ngam tö katöllöng tö Yāvē nö hayöng unôichrit ò.—1 Rā. 1:24-27, 38, 39.
Hěng tak ök aṅ tahëng panam inrē tö chiplö nö in Tāvit, ök aṅ Kitit ang Ittai. Hěngheuh ök kūön Tāvit ang Apsalem nö choholre nö la-al ò ngaich halo-ongkūö yik tarik nö tömrit ò. Ngaich holṙen Tāvit ang Ittai tö yik tö 600 ṙôken kumyung, ngaich hööngöre nö hòṅ kiyunglen ò. Ngaich vë-eny nang Ittai ang Tāvit tö ò nö aṅ tahëng panam, sōten ò anga-aṅ nö kiyunglen ò, öt hang pöri ang Ittai. Ngö ṙô anga-aṅ nö in Tāvit: “Sā ngam Mā Tēv [Yāvē] nö tö-aṅ, sā ngam rācha inrē ngam mā chu nö tö-aṅ, kô-òren ip töng chūök ngam mā chu ngam rācha min, yĕn i kinpaha hēk yĕn i unhômö, in e min inrē ngòh tarik meh!”—2 Sa. 15:6, 18-21.
Chiplö ang Ittai nö in Tāvit ngam tökatöllöng Tö Yāvē nö rācha
Pòrô yik aṅ Yěrit, aṅ Pēlet hēk aṅ Kitit nö tahëngö panam, sön cha-a nö ṙatö-ellōnre tö Yāvē nöng anga-aṅ tökô-en Tēv ngaich tökatöllöng ang Tāvit tö ò nö Rācha. Kô-en cha-a nö chiplö nö holṙen Tāvit. Öt kintöngulōn ayī-ö tö Rācha Tāvit nö ṙamlōn nö in cha!
a Im chööngö Yāvē tö kētu im līpöre Chööngö 23:3-6 nö ötkô yik aṅ Amön hēk aṅ Mô-ap nö iyöng el māṅ yik Israel, tö ngö manah angū-ö tö cha nö ötkô cha-a nö tarik alaha ngam panam Israel. Öt sōtu pöri cha-a nö hanôl më tarik ngam Tēv hēk iyöng in cha inrē. Ngëichkö ngam Insaet Òn Tö Iskripchör, Volume 1, pěch 95.
