LÓN án King Tafit we mwichen soufiu, a wor ekkewe mwán esap iir chón Israel, áwewe chék ren Selek seni Amon, Uria ewe re Hit, me Itma seni Moap. a (1 Kron. 11:​39, 41, 46) A pwal nóm “ekewe chon Cheret me chon Pelet meinisin, pwal ekewe wonopükü chon Kit.” (2 Sam. 15:18) Ussun itá ekkewe chón Cheret me chón Pelet iir úchék eú aramas me ekkewe chón Filistia. (Is. 25:16) Me ekkewe chón Kit ra feito seni Kat, eú án chón Filistia telinimw.—Jos. 13:​2, 3; 1 Sam. 6:​17, 18.

Pwata Tafit a mut ngeni ekkena mwán ar repwe chóni an we mwichen soufiu? A lúkúlúk pwe repwe túppwél ngeni, nge lap seni meinisin repwe túppwél ngeni Jiowa. Áwewe chék, iei met The New Interpreter’s Dictionary of the Bible a erá ussun ekkewe chón Cheret me chón Pelet: “Lón ekkewe fansoun mi kon áweires lón mwúún Tafit we, ra akkamwéchú ar túppwél ngeni.” Ifa ussun? Atun “ekewe re Israel” meinisin ra likitaaló pwe repwe fiti ewe “mwän mi aramasangau itan Sepa,” ekkewe chék chón Cheret me Pelet ra peni Tafit me álisi le aúkatiw ewe angangen ú ngeni. (2 Sam. 20:​1, 2, 7) Lón pwal eú atun, néún Tafit we Atonia a sótun angei seni wisan we. Iwe nge, ekkewe chón Cheret me Pelet ra túppwél ngeni me ra álisi le seikaatá Salomon an epwe king pún ina letipen Jiowa.—1 King 1:​24-27, 38, 39.

Itai ewe re Kit pwal i emén chón ekis a fókkun túppwél ngeni Tafit. Itai me néún kewe 600 soufiu ra álisi King Tafit atun néún we Apsalom a ú ngeni me okullu letipen ekkewe chón Israel pwe repwe ú ngeni ewe king. Me akkomwan Tafit a erá pwe Itai esap fiu pokiten i chón ekis. Nge Itai a ereni: “Mwo manauen ewe Samol mi Lapalap, pwal mwo manauen ai samol me ai king, ekis meinisin ia en kopwe feila ie, pwal ngang noum chon angang üpwe feila ie, ese lifilifil ika fetal ngeni mäla ika fetal ngeni manau.”—2 Sam. 15:​6, 18-21.

Inaamwo iká ekkewe chón Cheret, chón Pelet, me chón Kit iir chón ekis, nge ra fókkun súféliti Jiowa me lúkú pwe i ewe Kot mi enlet me Tafit a filitá me ren. A ifa me kilisoun Tafit ren án ekkena mwán mi túppwél álillis!