Wanziwa?
Sabwaya jani alobwana ahali ana Izrayel ankosa mpaddi wa anyakoddo a Mwene Davidi?
MWA alobwana ahali ana Izrayel akosa mpaddi wa anyakoddo a Davidi, anfwanyiwamo Selek mukadda Amon, Uriya mukadda Hit, na Jitma w’o Mowab. a (1 Map. 11:39, 41, 46) Mwa anyakoddo a Davidi, anfwanyeyamo vina “akadda Kreta, akadda Pelet, [na] akadda Gat.” (2 Sam. 15:18) Enkala ninga akadda Kreta na akadda Pelet ali a ziza na akadda Filisti. (Ezek. 25:16) Akadda Gat adhela mmuttetteni wa akadda Filisti yakuweliwa Gat.—Jos. 13:2, 3; 1 Sam. 6:17, 18.
Kito Davidi wattiyeli nni alobwana aba okosa mpaddi wa anyakoddo aye? Iyene wankuluvela wi alobwana aba ali oweddeyana na iyene, vina yamakamakaya, ali oweddeyana na Yehova. Motagiha, alogaga mwaha wa akadda Kreta na akadda Pelet, dicionário dhahi wa Bibilia ehiloga: “Awene ahidhowavi akalaga oweddeyana na Davidi masiki midhidhi dhorutxa dha olamulela waye.” Awene alagihile dhavi weddeyana wawa? Awene alagihile weddeyana oku mudhidhi omunyanyalile alobwana otene a Izrayel Mwene Davidi, banfwara Seba, akadda Kreta na akadda Pelet ahidhowavi akalaga na Davidi vina ahimukamihedha ogomiha na osadduwela wa Seba. (2 Sam. 20:1, 2, 7) Nsaka dhahi, mwana Davidi, Adonia wahitamela ovikosiha mwene vamburoni va Salomau. Mbwenyi akadda Kreta vina akadda Pelet ahidhowavi akalaga oweddeyana na Davidi vina ahimukamihedha Salomau okala mwene, sabwani eji yali efunelo ya Yehova.—1 Amwe. 1:24-27, 38, 39.
Mulobwana mwina wali oweddeyana na Davidi ddi Itai, mukadda Gat. Itai na alobwana aye owakwana 600, ahimukamihedha Mwene Davidi mudhidhi osadduweliwiye na mwanaye Absalau vina batamela wakwekwetta ana Izrayel okosa yakene. Vamaromo, Davidi wahimwaddela Itai wi, sabwa ya iyene ohikala muna Izrayel kafwanyela owana wi amukamihedhe. Mbwenyi Itai ohimwaddela: “Ddinimuddubela Mulugu oliwo, ddinddubela vina egumi yenyu, nyuwo mwene nabuyaga! Vanadhowe okala, nyuwo mwene nabuyaga, venevo okwa peno okalawo, miyo mwimeleli wenyu ddili na nyuwo.”— 2 Sam. 15:6, 18-21.
Itai wali woweddeyana na Davidi, mwene wasakuliwe na Yehova
Masiki akadda Kreta, akadda Pelet na akadda Gat valani anawedda, awene annonelamo wi ddi Yehova oli Mulugu webaribari vina wi Davidi wasakuliwe na Yehova. Se waganyedha mwene Davidi wantamalela venjene sabwa ya alobwana aba oweddeyana okala na iyene!
a Mowiwanana na nlamulo navahile Yehova ana Izrayel ninfwanyeya va Olibiha 23:3-6, akadda Amon, akadda Mowab kafwanyela okosa mpaddi wa nlogo na Izrayel. Enoneya ninga nlamulo ntti naloga bahi mwaha wa malogo aba ohirumeliwa ninga ana Izrayel, mbwenyi kàkoddiha anawedda okala vamodha na nlogo na Mulugu. Koona “Casamentos com Israelitas” mwari mwa mutoma “Amonitas” mu Estudo Perspicaz das Escrituras.
