¿Kʼawuabasika?
¿Kʼãrẽa ʉ̃kʉrʉ ẽbẽrarã Israeldebema ẽãra David gorogororane edapanasi?
Ʉ̃KɄRɄ ẽbẽrarã israelitara ẽãta David gorogororanebadara, naʉ̃rabasi Zélec Ammonebemata, Urías Hitdebemata akʉza Itmá Moabdebemata (1 Crón. 11:39, 41, 46). a Adewara David gorogororane edapanasi keretitarata, peletitarata, hititarata (2 Sam. 15:18). Keretiratarata akʉza peletitaraʉ̃mera pilisteoraneba zesibaibara (Ezeq. 25:16). Akʉza guititarãra pʉwʉrʉ Gad Filisteadebemabasi (Jos. 13:2, 3; 1 Sam. 6:17, 18).
¿Kʼãrẽa Davidbara jʉrʉsi naʉ̃ ẽbẽra Israeldebema ẽãta? Davidbara ĩjãbasi naʉ̃ra ẽbẽrarãra iyiare bʼaita akʉza Jeowarebida. The New Interpreterʼs Dictionary of the Bible naʉ̃ta jarabʉ keretitara ʉ̃rʉ akʉza peletitara ʉ̃rʉ: «David bedʼea zroma berabarinʉmaside naʉ̃ra ẽbẽrarãra iyiʉ̃me kʼẽrẽpabasi». ¿Sãwũã kʼawuapanʉ maʉ̃ra? Sebaba David ʉ̃rʉ imitia bedʼeasidera yumakẽrãra Israeldebemarabara idubʉsida Davidʼra, mamina keretitaraba akʉza peletirabara Davidʼra idubʉda ẽ basi, iyiʉ̃me kʼẽrẽpapanasi (2 Sam. 20:1, 2, 7). Akʉza tẽãne David warra Adoníasʼra iyibari nokʼo bakĩrãbasi, mamina keretitarata akʉza peletitarãra Davidʼʉ̃me kʼẽrẽpabasi akʉza kʼarebasida Jeowaba jidadata nokʼobabita, Salomónta (1 Rey. 1:24-27, 38, 39).
Adewara ẽbẽrarã Israeldebema ẽ Davidʼʉ̃me kʼẽrẽpabadara Ittái basi, iyira Gadʼdebemabasi. Adewara David warra Absalónbara jãrĩkĩrãbasi yi zeze nokʼota, maʉ̃ kʼarea iyara sewakʉasi wuabema ẽbẽrarãta Davidʼare pana ẽ marẽã, mamina Ittáita akʉza yi 600 gorogororãra iya zokʼabadara Davidʼʉ̃me kʼẽrẽpabasi. Mamina Davidba jarasi Ittáiʼa iyira Israeldebema ẽ baera kʼãrẽ kʼãrẽa iyi barira yõira nesida ẽãta awuarabʉrʉ wãmarẽã jarasi maʉ̃ pʉwʉrʉdeba. Mamina Ittáiba Davidʼa jarasi: «Jeowa bʉedara akʉza mʉ̃ nokʼo bʉedara, mʉ̃ nokʼo wãbʉrʉmae mʉ̃sida wãñi, iyiʉ̃me bʼaita mawũã ẽ bʉrʉ beita» (2 Sam. 15:6, 18-21).
Ittáira kʼẽrẽpabasi Davidʼʉ̃me, Jeowaba jidadaʉ̃me
Keretitarata, peletitarata akʉza guititarãra Israeldebema ẽ basimina ãya bia kʼawuapanasi Jeowara Daizezearata akʉza kʼawuapanasi Davidʼra Jeowaba jidadata. Mawũẽra Davidbara Jeowaʼa mejãcha biga diabasi naʉ̃ra ẽbẽrarã iyiʉ̃me kʼẽrẽpapanasi baera.
a Daizeze leyba Deuteronomio 23:3-6 bayeda jarabʉbara, jarakĩrãbasi ammonitarata moabitaʉ̃mera israelitarabawara ãbabʉmina ãyara akʉda ẽ baibarabasita ãyira maʉ̃ pʉwʉrʉdebemata. Bʉa audre kʼawuakĩrãbʉbʉrʉ akʉra Perspicacia para comprender las Escrituras, jʉrʉda «Ammonitas» abʉmae, maʉ̃re jʉrʉda subtitulo «Se casan con israelitas».