KOWNU David be abi man aini a suudati kulu fi en di á be de Islayelisama. Wantu fu den man ya a Seilek di be de wan Amonsama, Uriya di be de wan bakapikin fu Hét, anga Yitma fu Moab a (1 Kolon. 11:39, 41, 46). Den ‘Kreitisama’, den ‘Pleitisama’ anga den ‘sama fu Gat’ be de aini a suudati kulu fu David tu (2 Sam. 15:18). A gei enke den Pleitisama anga den Kreitisama a be koosube famii (Eseik. 25:16). Kande a den sama fu Gat a den sama di be e tan aini a Filisteya foto Gat.​—Yow. 13:2, 3; 1 Sam. 6:17, 18.

Saide David be teke den man ya aini a suudati kulu fi en? Bika a be e biibi taki den man ya be o du san a taki. A be e biibi taki den be o aliki Yehofa tu. Wan Beibel wowtu buku e taki fu den Pleitisama anga den Kreitisama taki: ‘A omen sani be e miti David di a be e tii, ma noiti den á gwe fika en.’ Fa den du a sani ya? Di ‘ala den man fu Islayeli’ gwe fika Kownu David ‘fu go waka a Seiba’ baka, den Pleitisama anga den Kreitisama á be gwe fika en. Den be yeepi en fu feti anga Seiba (2 Sam. 20:1, 2, 7). Wan fu den taa okasi pe den soi taki den á gwe fika en, a di a boi fu Kownu David, Adoniya be wani toon kownu a Salomo peesi. Den Peleitisama anga den Kreitisama be du san David be wani. Den be yeepi David fu poti Salomo enke kownu, bika neen na a sama di Yehofa be wani toon kownu.​—1 Kow. 1:24-27, 38, 39.

Itai seefi á be gwe fika David. Itai a be wan sama fu Gat. En anga den 600 man fi en be holibaka gi Kownu David di Absalom be wani teke en dda peesi enke kownu. Ma David taigi Itai taki a naafu feti gi en, bika en a wan taa kondee sama. Ma Itai piki en taki: ‘Mi lesipeki Kownu, leti enke fa mi sabi taki yu anga Yehofa de a libi, a letiso mio de ai se mi hii libi langa, winsi mi mu dede seefi.’​—2 Sam. 15:6, 18-21.

Winsi fa den Pleitisama, den Kreitisama, anga den sama fu Gat a be taakondee sama, toku den be e lesipeki Yehofa enke a tuu Gadu. Den be e lesipeki David tu, bika neen Yehofa be salufu. Ná pikin bigi a be musu e bigi gi David fu wooko makandaa anga den man ya.