Ana Inyim?
Nna ebɛnadze ntsi na ahɔho binom ka Ɔhen David no nsordaafo dɔm no ho?
DAVID ne mbarimba akofo a nna wɔnnyɛ Israelfo no, nna hɔn mu binom nye Ammonnyi Zelek, Hittinyi Uriah, na Moabnyi Ithmah. a (1 Mber. 11:39, 41, 46) Afei so, nna David no nsordaafo no mu binom yɛ ‘Cherethfo, Pelethfo, na Gittifo.’ (2 Sam. 15:18) Ɔbɛyɛ dɛ nna Cherethfo na Pelethfo no nye Philistiafo no bɔ ebusua. (Ezek. 25:16) Gittifo no so, nna hɔn nkyir fi Philistiafo hɔn kurow Gath mu.—Josh. 13:2, 3; 1 Sam. 6:17, 18.
Ebɛnadze ntsi na David maa dɛm ahɔho yi kwan ma wɔbɛkaa no nsordaafo dɔm no ho no? Nna ɔgye dzi paa dɛ dɛm nkorɔfo no bedzi no nokwar, na dza ɔkyɛn iyi mpo no, nna onyim dɛ wobedzi Jehovah so nokwar. Sɛ yɛbɛyɛ nhwɛdo a, buukuu bi a ɔkyerɛkyerɛ Bible no mu a wɔato dzin The New Interpreter’s Dictionary of the Bible ka Cherethfo nye Pelethfo ho asɛm dɛ: “David n’ahendzi nda no mu no, wodzii no nokwar wɔ mber a no mu yɛ dzen mpo mu.” Ebɛnadze na dɛm mbarimba yi yɛe? Aber a “Israel mbarimba no nyinara” gyaa Ɔhen David n’ekyir dzi na wokedzii ‘ɔbarimba otuatsewnyi bi a ne dzin dze Sheba’ n’ekyir no, Cherethfo nye Pelethfo no kɔr do taa David n’ekyir, na wɔboaa no ma osiiw Sheba n’etuatsew no ano. (2 Sam. 20:1, 2, 7) Ber bi so, Ɔhen David ne ba Adonijah yɛɛ dɛ ɔbɛgye ahendzi no abɔ do aber a nna ɔsɛ dɛ Solomon mbom na odzi adze no. Dɛm aber no so, Cherethfo yi nye Pelethfo no dze nokwardzi taa David n’ekyir, na wɔboae ma wɔdze Solomon sii ahengua no do. Osiandɛ nna Solomon nye obi a Jehovah nankasa eyi no dɛ ondzi ne papa David n’adze.—1 Ahe. 1:24-27, 38, 39.
Afei so, ɔbarimba fofor bi so a nna ɔnnyɛ Israelnyi dzii David nokwar, na ɔtaa n’ekyir. Nna wɔfrɛ no Ittai, na ɔyɛ Gittinyi anaa Gathnyi. Aber a Ɔhen David ne ba Absalom tseew no do etua, na ɔdaadaa Israelfo mbarimba ma wɔsoɛree tsiaa no no, Ittai nye ne mbarimba akofo 600 kɛtaa David n’ekyir. Ahyɛse no, David kaa kyerɛɛ Ittai dɛ ɔnnyɛ Israelnyi ntsi onnyi dɛ ɔdze no ho gyegye ɔko no mu, osiandɛ ɔko no nnyɛ no ko. Naaso Ittai kaa kyerɛɛ no dɛ: “Dɛ [Jehovah] tse ase, na mo wura ɔhen tse ase yi, ampa beebiara mbrɛ mo wura ɔhen bɛtsena no, sɛ owu mu o, nkwa mu o, mekyerɛ hɔ ara so na w’akowaa bɛtsena.”—2 Sam. 15:6, 18-21.
Ittai dzii David nokwar na ɔdze noho takyeer no ho, osiandɛ nna David nye ɔhen a Jehovah asera no
Ɔwɔ mu dɛ nna Cherethfo, Pelethfo, na Gittifo no nyinara nnyɛ Israelfo dze, naaso nna wɔwɔ obu kɛse ma Jehovah na wɔgye dzi paa dɛ ɔno nye nokwar Nyankopɔn no. Afei so, nna wɔgye to mu dɛ David yɛ obi a Jehovah asera no. Ɔbɛyɛ dɛ David n’enyi gyee paa dɛ nna ɔwɔ mbarimba anokwafo a wɔtse dɛm wɔ ne nkyɛn!
a Sɛ yɛhwɛ asɛm a ɔwɔ Deuteronomy 23:3-6 no a, Nyankopɔn ne mbra no kaa dɛ, onnyi dɛ Ammonfo na Moabfo hɛn Nyankopɔn ne bagua no mu. Dɛm asɛm yi kyerɛ dɛ, nna Ammonfo anaa Moabfo nnyi hokwan biara a wobotum dze abɛyɛ Israelfo. Naaso nna iyi nnkyerɛ dɛ Ammonfo na Moabfo runntum nnye Israelfo no mmbɔ, anaa wɔnye hɔn mmbɛtsena. Hwɛ buukuu a wɔato dzin Insight on the Scriptures, Volume 1, kr. 95.
