O Bau Kila?
Na cava era lewe kina ni mataivalu nei Tui Tevita na vulagi?
ERA lewe ni mataivalu i Tevita eso na tagane vulagi. Kena ivakaraitaki, o Seleki na Amoni, o Uraia na Itaiti, kei Icema na kai Moapi. a (1 Vei. 11:39, 41, 46) Era lewe tale ga ni mataivalu qori o ira na “kai Kireci, o ira na kai Pileci, kei ira na kai Kaca.” (2 Sam. 15:18) E dau nanumi tu ni o ira na kai Kireci kei ira na kai Pileci era veiwekani voleka kei ira na kai Filisitia. (Isik. 25:16) O ira na lewe i Kaca era lako mai na koro vakaFilisitia o Kaca.—Josua 13:2, 3; 1 Sam. 6:17, 18.
Na cava e vinakata kina o Tevita mera lewe ni nona mataivalu na vulagi? E nuidei nira yalodina vua, koya e bibi sara nira yalodina vei Jiova. Kena ivakaraitaki, e tukuna e dua na ivolavosa vakaivolatabu me baleti ira na kai Kireci kei ira na kai Pileci: “Era yalodina tiko ga vei Tevita ena gauna dredre duadua ni nona veiliutaki.” Ena sala cava? Nira biuti Tevita “kece na lewe i Isireli” mera muria “e dua na dauvakacaca na yacana o Sipa,” o ira ga na kai Kireci kei ira na kai Pileci era yalodina tiko ga vei Tevita, ra qai veivuke ena nona tarovi na dau veitusaqati o Sipa. (2 Sam. 20:1, 2, 7) Dua tale na gauna, e saga na luvei Tui Tevita o Atonaija me kovea na veiliutaki vakatui. Ia era yalodina tiko ga vei Tevita na kai Kireci kei ira na kai Pileci ra qai buli Solomoni, o koya e digitaka o Jiova me veisosomitaki.—1 Tui 1:24-27, 38, 39.
Dua tale na vulagi a yalodina sara ga vei Tevita, ya o Itai na kai Kaca. E tokoni Tui Tevita o Itai kei na 600 na nona tamata, ni talaidredre o Apisalome na luvei Tevita qai rawa tiko ga na lomadra na Isireli mera saqata na tui. Dua na gauna e liu a tukuna o Tevita vei Itai ni na sega ni vala ena vukuna baleta ni vulagi. Ia e kaya o Itai: “Me vaka ni bula dina tiko o Jiova, oni bula tale tiko ga na noqu turaga na tui, na vanua ga ena tiko kina na tui, se mani mate se bula, ena tiko kina na nomuni dauveiqaravi!”—2 Sam. 15:6, 18-21.
E yalodina o Itai vei Tevita na tui lumuti i Jiova
Era vulagi na kai Kireci, o ira na kai Pileci, kei ira na lewe i Kaca, ia era kila ni o Jiova ga na Kalou dina, e nona lumuti tale ga o Tevita. Dua na ka nona marau o Tevita nira tokoni koya na tagane yalodina qori!
a E tukuna na Lawa ni Kalou ena Vakarua 23:3-6 mera kua ni lewena na ivavakoso ni Isireli o ira na kai Amoni kei ira na kai Moapi. Ia kena irairai ni lawa qori e dusia na nodra mai lewe sara ga ni matanitu o Isireli. E sega gona ni vakatabuya na nodra veimaliwai kei na nodra tiko veivolekati kei ira na tamata ni Kalou. Raica na Insight on the Scriptures, Volume 1, t. 95.
