Tumi Zannam Aslim?
Raza Davidachea soinikam modem Izraelitkar nhoi te munis pasun kiteak asle?
DAVIDACHEA soinikam modem Izraelitkar nhoi te munis pasun asle. Zoxem Amonit kulliecho Zelek, Uria Hitit, ani Moabit Hitma. a (1 It. 11:39, 41, 46) Toxench, ‘Keritit, Peletit ani Gatha thaun ailʼle munis’ pasun asle. (2 Sam. 15:18) Gathantle lok Filistevkar asle. (Josh. 13:2, 3; 1 Sam. 6:17, 18) Toxench, Keritit ani Peletit lokanchem Filistevkaram sangata lagxilʼlem natem aslem oxem dista.—Ez. 25:16.
Davidan hea munxank aple soinik kiteak zaunk dile? Karonn te apnnak, ani mhotvachem mhunnttlear Jehova Devak visvaxi asat mhunn to zannam aslo. Udharonnak, Keritit ani Peletit lokam vixim The New Interpreter’s Dictionary of the Bible oxem sangta: “Davidachea razvottkechea ekdom kotthin vellar te taka visvaxi ravle.” Koxe? ‘Sheba nanvachea eka khottea munxacho’ pattlav korunk lagon, Izraelachea dor eka munxan Davidacho pattlav korcho soddun dilo tednam, Keritit ani Peletit Davidak visvaxi ravle. Ani Davidak modot korunk Sheban suru kelʼlo virodh tannim vaddonk diunk na. (2 Sam. 20:1, 2, 7) Toxench, anik ek pavtti Davidacho put Adonija, Solomonachea zagear raza zaunk sodhtalo tednam, Keritit ani Peletitamnim Davidak tenko dilo ani Solomonak raza korunk taka modot keli. Karonn Jehovan Davida uprant Solomonak raza zaunk vinchun kaddlolo.—1 Raz. 1:24-27, 38, 39.
Anik ek Izraelitkar nhoi to munis Davidak khub visvaxi aslo. To zaun aslo Gathacho Ittai. Ek pavtt Davidacho put Absalanv, Davidacher add vochon Izrael lokank fottoun tanchim kallzam aplea lagim voddunk sodhtalo. Tednam Ittai ani tachea 600 zhuzareamnim Davidak tenko dilo. Ittai ek Izraelitkar nhoi ani tannem apleak modot korchi goroz na oxem Davidan Ittaiak sanglem tednam tannem tachem aikonk na. Punn tannem Davidak mhunnttlem: “Jivea Devachea ani mhojea Dhonia Razachea Nanvan soput. Mornnant vo jivitant, zoim mhozo Dhoni Raza astolo, thoim tuzo sevokui astolo.”—2 Sam. 15:6, 18-21.
Jehovan makhlolea razak Ittai visvaxi ravlo
Kerititkar, Peletitkar ani Gathantle munis Izraelitkar nasle. Tori astana tannim Jehova Devak khoro Dev, ani Davidak tannem vinchun kaddla mhunn manun ghetlo. Tor aplea sangata osle visvaxi munis asle mhunn David kitlo khuxal zalo astolo nhoi!
a Dusri Somurt 23:3-6-a pormonnem, Ammonitamnim ani Moabitamnim Izrael sobhent bhitor ieunk zainaslem. Hacho orth, tankam ghoddie Izrael raxttracho nagrik zaunk vo eka Izraelitkarak astat te hok’k mellonasle. Punn tannim Devachea lokam borabor ravonk vo tanchea sangata vell sarunk zatalo. Insight on the Scriptures hantunt, “Ammonites” hea vixoi-a khala “Intermarriage With Israelites” hem polloiat.
