¿Pütüjaa aaʼu?
¿Jamüshii eejanaka surulaat nnojoliikana israelitain naʼaka na nusurulaatsekana David?
Naʼaka na nusurulaatsekana David eejana na nnojoliikana israelitain maʼaka naaʼin Zélec nüpüshi nia Ammón, Urías nüpüshi nia Het otta müshia Itmá nüpüshi nia Moab (1 Crón. 11:39, 41, 46). a Otta eejana naʼaka wayuu keretita, peletita otta guitita (2 Sam. 15:18). Na keretitakana otta na peletitakana eeshii süpüla napüshin naya na filisteokana (Ezeq. 25:16). Na guitita eejanakana naʼaka nusurulaatse David chejeʼewalii naya Gad eere noumain na filisteokana (Jos. 13:2, 3; 1 Sam. 6:17, 18).
¿Jamüshii nuuʼulaaka David naya wayuukana naʼakain nusurulaatse? Nütüjaa aaʼu waneepieenain naya nümaa otta nümaa Jehová. Anuu tü sümakat wanee diccionario aashajaaka süchiki tü ashajünakat suluʼu tü Bibliakat nachiki na keretitakana otta na peletitakana: «Soʼunnaa nuluwataain David aainjünüsü kasa mojusü nümüin, waneepiapejeʼe naya wayuukana nümaa. Jamüshijaʼa wanaa sümaa niʼrüijaain wayumüin Seba, wanaawasü naaʼin na israelitakana nümaa Seba, napütüin David. Eekajasaʼa na keretitakana otta na peletitakana oʼunushii naya apashii sünain neipirüin Seba» (2 Sam. 20:1, 2, 7). Soʼu wanee kaʼiya, Adonías chi nüchonkai David naaʼinrüin waneirua kasa süka nuluwataweein nuulia Salomón. Nayasaʼa na keretitakana otta na peletitakana nakaalinjain David sünain aaʼinraa waneirua kasa süpüla nüikaleʼennüin Salomón süpüla aluwatawaa, chi nüneekalakai Jehová (1 Rey. 1:24-27; 38, 39).
Wanee wayuu nnojoikai israelitain waneepiakai nümaa David nia Ittái chi chejeʼewaikai Gad. Jamüsüjaʼa wanaa sümaa nemeejünüin aaʼin na israelitakana nutuma Absalón, chi nüchonkai David, shiiʼiree nüneekünüin süpüla nuluwataainjachin nuulia David, aʼluwataashi David. Nuʼuneeka Ittái nümaa. Nnojotsü choʼujaain naashin David nuʼunajachin Ittái nümaa süka nnojolin israelitain nia. «Nümakalaka Ittái nümüin chi aluwataashikai: ‹Maʼaka shiimain katüin noʼu Jehová jee katüin poʼu piakai aluwataashikalee, oʼuneechi taya pümaa eepünaale pia jaʼitaichi outuin taya saalinjee tia jee katülejeʼeya toʼu›» (2 Sam. 15:6; 18-21).
Waneepiashi Ittái nümaa David chi nüneekajalakai Jehová süpüla aluwatawaa.
Mayaainjeʼe nnojoliin israelitain na keretitakana, na peletitakana otta na guititakana nayaawata aaʼulu niain Jehová chi Maleiwa shiimainshikai otta niain David chi nüneekajalakai süpüla aluwatawaa. Talatakajasaʼa naaʼin David süka eejanain nümaa wayuu waneepiakana nümaa Jehová.
a Saʼaka tü Pütchi Aapünakat nümüin Moisés ashajünaka suluʼu Deuteronomio 23:3-6, aküjünüsü nnojoliinjanain naʼakain na nüpüshikana Jehová na moabitakana otta na ammonitakana. Nnojotpejeʼe shiain aküjünüin sükajee tia pütchikat nnojoliin süpüla kepiain naya naʼaka jee nnojoliin süpüla kottiraain naya namaa na israelitakana. Tü aküjüneekalü achiki shia nnojoluin süpüla saapünüin namüin waneirua kasa aapünaka neʼe namüin na israelitakana. Paashajeʼera suluʼu Perspicacia para comprender las Escrituras tü pütchikat «Se casan con israelitas» eere sümüin «Ammonitas» (alijunaikiruʼusü).
