Jaikuaave hag̃ua
¿Mbaʼérepa oĩ vaʼekue extranhéro David ehérsitope?
DAVID oreko vaʼekue ijehérsitope kuimbaʼe ndahaʼéiva israelita. Por ehémplo Zélec pe ammonita, Urías pe hitita ha Itmá pe moabita (1 Crón. 11:39, 41, 46). a Avei oĩ vaʼekue umi “keretita ha peletita” ha umi “kuimbaʼe ou vaʼekue Gátgui” (2 Sam. 15:18, nóta). Posívlemente umi keretita ha peletita oñohénte vaʼekue umi filistéondi (Ezeq. 25:16). Ha umi hénte oikóva Gátpe haʼe vaʼekue avei filisteo (Jos. 13:2, 3; 1 Sam. 6:17, 18).
¿Mbaʼérepa David oheja vaʼekue oĩ umi extranhéro ijehérsitope? Pórke haʼe oĩ vaʼekue segúro haʼekuéra ndohejamoʼãiha chupe, ha iñimportanteveha ifieltaha hikuái Jehovápe. Por ehémplo, peteĩ diksionário bíblico heʼi: “Haʼekuéra ndohejái vaʼekue Davídpe ni pe ijetuʼuvérõ guare haʼe ogovernaha tiémpope”. ¿Siértopa upéva? Si. Por ehémplo, una vuéltape “umi kuimbaʼe Israelgua” oheja rei Davídpe “ha omoirũ Sébape”, haʼéva peteĩ kuimbaʼe ‘provlémante voi ohekáva’. Upérõ umi keretita ha peletita osegi vaʼekue oapoja Davídpe ha oipytyvõ anivéma hag̃ua oñepuʼã igoviérnore (2 Sam. 20:1, 2, 7). Ótra vuéltape, David raʼy hérava Adonías, oñehaʼã vaʼekue ojupi de rréi ndotokáiramo jepe chupe upéva. Péro umi keretita ha peletita ojepytaso David ykére ha oipytyvõ Salomónpe opyta hag̃ua rréiramo, pórke Jehová oiporavo vaʼekue chupe (1 Rey. 1:24-27, 38, 39).
Ótro extranhéro ojepytaso mbarete vaʼekue David ykére héra Ittái. Haʼe haʼe vaʼekue peteĩ kuimbaʼe oúva Gátgui. David raʼy, hérava Absalón, opuʼã vaʼekue itúare ha ojehayhuka la héntepe oñemoĩ hag̃ua chupe rréiramo. Upérõ Ittái ha umi 600 isoldádo oapoja rréi Davídpe. Péro David heʼi vaʼekue Ittáipe haʼe haguére extranhéro natekotevẽiha oñorairõ hesehápe. Ittái katu heʼi: “Che ruvicha, ahura nde rekovére ha Ñandejára Jehová oikovévare, che ahataha nde rehohápe, ha tekotevẽramo amano, amanóta avei pórke che adesidíma romoirũtaha” (2 Sam. 15:6, 18-21).
Ittái ojepytaso vaʼekue David ykére, haʼéva pe rréi Jehová voi onombra vaʼekue
Umi keretita, peletita ha umi kuimbaʼe Gatgua extranhéroramo jepe, orrekonose vaʼekue Jehová haʼeha Ñandejára tee ha David haʼeha pe rréi haʼe oelehi vaʼekue. ¡Oime vaʼerã ovyʼaite raʼe David oikuaávo orekoha ijykére koʼãichagua kuimbaʼe ifieletéva!
a Según Deuteronomio 23:3-6, umi ammonita ha moabita ndaikatúi vaʼekue oike Jehová kongregasiónpe. Ko léi ohechaukánte haʼekuéra ndaikatuiha oreko entéro umi derécho orekóva peteĩ israelita teete. Péro ndeʼiséi vaʼekue ndaikatuiha ojeheʼa umi israelítare ha oiko ijapytepekuéra, oadoráma guive Jehovápe haʼe oipotaháicha. Ehecha Perspicacia para comprender las Escrituras, heʼihápe “Ammonitas” ha upéi “Se casan con israelitas”.
