¿Ne gare mäi?
¿Ñobätä nitre menteni nämäne nitre rüka Davidkwe ngätäite?
NITRE rükä Davidkwe ye ngätäite nitre ñan israelita nämäne arato, ñodre: Zélec ni ammonita, Urías ni hititta aune Itmá ni moabita (1 Crón. 11:39, 41, 46). a Nitre “Keretita, nitre peletita aune nitre guitita nämäne arato” (2 Sam. 15:18). Nitre keretita aune nitre peletita ye nämäne ja kete nitre filisteo ben kwrere raba ruin nie (Ezeq. 25:16). Nitre guitita niaratre ye nünanka juta nitre filisteokwe kä Gat yete (Jos. 13:2, 3; 1 Sam. 6:17, 18).
¿Ñobätä Davidkwe nitre menteni tuanimetre nemen rükä kwe arato? Ñobätä ñan aune niaratre ñan ja ngwain metre niara aibe ie ñakare aune Jehovai ye nämäne gare metre ie. Ñodre blitata nitre keretita aune nitre peletita yebätä ngwane tärä, The New Interpreter’s Dictionary of the Bible tä niere: “David nämäne reire ye ngwane niaratre ja ngwani metre ie kukwe tare yebiti ta”. ¿Ñokänti gare nie? “Nitre jökrä Israel” käkwe rei David tuanimetre kaibe rikakäre “ni iti ja mikaka rüere kädeka nämäne seba ye jiebiti” ngwane, nitre keretita aune peletita käkwe David dimikani rükäre nitre ja ketaka Seba ben ye rüere (2 Sam. 20:1, 2, 7). Bati, David monsoi kädeka nämäne Adonías tö namani gobran rünkwe ye diain jai. Akwa nitre keretita aune peletita käkwe ja ngwani metre jankunu David ie aune dimikani, ne kwe Salomón rabadre reire David bitikäre, Jehovakwe dianinkä rabakäre reire ye nämäne gare ietre yebätä (1 Rey. 1:24-27, 38, 39).
Ni menteni iti käkwe ja ngwani metre David ie ye abokän Ittái ni guitita. Ittái aune nitre 600 rükä kwe yekwe David dimikani, Absalón David ngobo mada yekwe ja mikani David rüere aune nitre Israel töi mikani kwe niara mike gobrane ngwane. Davidkwe niebare Ittái ie niara ni menteni yebätä ñan rüdre kwe niara dokwäre. Akwa Ittái niebare rei käre: “¡Jehová aune ti dänkien gobranka tä nüne, medente ti dänkien rei täi, yete ti ni sribikä kwe täi arato, tikwe nünandre o ti murie ketadre kärera!” (2 Sam. 15:6, 18-21).
Jehovakwe David dianinkä reire ye ie Ittái ja ngwani metre.
Nitre keretita, peletita aune guitita ye nitre menteni, Jehová ye Ngöbö metre nämäne gare ietre aune David mika nämäne ütiäte kwetre ñobätä ñan aune Ngöbökwe dianinkä. Metrere nitre ja ngwanka metre nämäne David ben käre yebätä debe biani krubäte kwe gare nie.
a Lei Ngöbökwe tä tikani Deuteronomio 23:3-6 yekänti nitre ammonita aune moabita ye ñaka rabadre niken konkrekasion Israelkwe yete mikata gare. Ye medenbätä niaratre ñaka rabadre nüne ja käite kwrere kä yekänti. Akwa tädre juta Ngöbökwe yete siba aune ni menteni kwrere ye ñan ñäkäi nämäne ietre. Tärä Perspicacia para comprender las Escrituras yebätä mäkwe kukwe känä, mä rika “Ammonitas” nieta yete, biti “Se casan con israelitas” ye känändre.
