Walimenyere Si?
Bulagurhe Abalume Barhali Baizraeli Baliri omu Basoda ba Mwami Daudi?
OMU basoda ba Mwami Daudi mwaliri abalume barhaliri Baizraeli, omufano: Seleki w’Omuamoni, Uria w’Omuhiti na Itma w’Omumoabu. a (1 Ny. 11:39, 41, 46) Omu basoda bage mwaliri “Abakereti, Abapeleti na Bagati.” (2 Sa. 15:18) Abantu baliri bawaza okw’Abakereti na Bapeleti baliri chigabi ch’Abafilistini. (Eze. 25:16) Bibonekene okw’Abagati barhengaga omu vile y’Abafilistini ye Gati.—Yos. 13:2, 3; 1 Sa. 6:17, 18.
Bulagurhe Daudi akazigire abantu barhali Baizraeli babe omu basoda bage? Daudi alichizerere okw’abola balume bali bemana kuye, n’echola ch’echaliri ch’akamaro ku Yehova. Omufano, oku bilolere Abakereti n’Abapeleti, The New Interpreter’s Dictionary of the Bible (Ediksiyonere nguma y’Ebiblia) ederhere ntya: “Baliyorhere bemana ku Daudi omu mango m’ebibazo bikomere bwenene omu burhegesi bwage.” Nka gurhe baliyerekene obwimana bwabo kuye? Amango “abalume boshi be Izraeli” baleka Mwami Daudi n’okukulikira “omubandi Sheba,” Abakereti n’Abapeleti bowe bayorha haguma na Daudi bamurhabala kuhima obugamba Sheba arhonderesaga. (2 Sa. 20:1, 2, 7) Omu mandi mango, Adoniya mugala wa Mwami Daudi alisimire yebage mwami ahali ha Sulemani. Aliko, Abakereti n’Abapeleti bagenderera kubera bemana ku Daudi banamurhabala kushimika Sulemani, eyi Yehova achishogaga oku agombola Daudi oku chirhi ch’Obwami.—1 Fa. 1:24-27, 38, 39.
Owindi muntu orhaliri mu Izraeli waligenderere kubera mwimana ku Daudi, ali Itai we Gati. Itai n’abasoda bage 600 balirhabere Mwami Daudi amango Absalomu achijira chigamba, anashumika Abaizraeli boshi baje oku lunda lwage nantyo bamushimike yebage mwami ahali ha Daudi. Daudi abwira Itai oku bulala arhaliri mw’Izraeli arhalikwanene kuja kumulwira. Aliko Itai aderha ntya: “Kweri, okuntu Yehova alamire n’okuntu waliha wani mwami alamire, hoshi waliha wani mwami aba, lube lufu changwa kalamo, ahola ha n’omuja wawe aba!”—2 Sa. 15:6, 18-21.
Itai aliri mwimana ku Daudi, Mwami mushigwa wa Yehova
Chiro akaba oku Abakereti, Abapeleti n’Abagati barhaliri Baizraeli, balimenyere oku Yehova ali Mungu w’okuli n’oku Daudi ali mushigwa wa Yehova. Daudi akwanene kuba ey’aligwerhe obusime b’okugwarha abalume bemana bali nk’abola bali oku lunda lwage!
a Erhegeko lya Mungu liri omu Kumbukumbu la Torati 23:3-6 lyalilahize Abaamoni n’Abamowabu oku barhajaga omu chibaga che Izraeli. Aliko, bibonekene oku nkabaga elyola rhegeko lyaliri lyaderhera oku kuba loshi-loshi mw’elyola shanja nka Muizraeli w’akaburhano, si lirhalibuzize omuntu orhali mw’Izraeli kulama changwa kukola haguma n’abantu ba Mungu. Olole echitabu Étude perspicace des Écritures, Volume 1, buk. 100.
