Nahibaluan Mo Bala?
Ngaa may mga indi Israelinhon sa kasuldadusan ni Hari David?
MAY mga indi Israelinhon sa kasuldadusan ni David. Nalakip sa ila si Zelek nga Ammonhon, si Urias nga Hethanon, kag si Itma nga Moabnon. a (1 Cron. 11:39, 41, 46) Nalakip man sa mga soldado ni David ‘ang mga Keretnon, ang mga Peletnon, kag ang mga Gathanon.’ (2 Sam. 15:18) Posible nga malapit nga paryente sang mga Filistinhon ang mga Keretnon kag ang mga Peletnon. (Ezeq. 25:16) Ang mga Gathanon naman naghalin sa isa ka siudad sang mga Filistinhon nga ginatawag nga Gat.—Jos. 13:2, 3; 1 Sam. 6:17, 18.
Ngaa ginlakip ni David sa iya mga soldado ining mga indi Israelinhon? Bangod kumbinsido sia nga mainunungon sila sa iya. Kag ang mas importante, mainunungon sila kay Jehova. Halimbawa, parte sa mga Keretnon kag mga Peletnon, ang The New Interpreter’s Dictionary of the Bible nagsiling: “Nangin mainunungon sila kay David bisan sa pinakamabudlay nga mga sitwasyon sa tion sang iya paggahom.” Paano nila ini ginpakita? Sang ginbiyaan sang “tanan nga lalaki sang Israel” si Hari David para magsunod kay Sheba “nga pirme lang nagapangita sing gamo,” nagpabilin ang mga Keretnon kag ang mga Peletnon kay David kag nagbulig sila para mauntat ang pagrebelde ni Sheba. (2 Sam. 20:1, 2, 7) Kag sang gusto agawon sang anak ni Hari David nga si Adonias ang trono, ginpakita liwat sang mga Keretnon kag sang mga Peletnon nga mainunungon sila kay David. Nagbulig sila para si Solomon ang maggahom bilang hari bangod sia ang ginpili ni Jehova.—1 Hari 1:24-27, 38, 39.
Ang isa pa ka indi Israelinhon nga mainunungon gid kay David amo si Itai nga Gathanon. Sang nagrebelde ang anak ni Hari David nga si Absalom kag gintinguhaan niya nga kuhaon ang suporta sang mga Israelinhon, padayon nga ginsuportahan ni Itai kag sang iya 600 ka soldado si David. Sang primero, ginsilingan ni David si Itai nga bangod indi sia isa ka Israelinhon, indi niya kinahanglan nga makig-away para sa iya. Pero nagsiling si Itai: “Ginapanumpa ko sa buhi nga Dios nga si Jehova kag sa atubangan sang ginuo ko nga hari, bisan diin magkadto ang ginuo ko nga hari, maupod ang imo alagad, mapatay man ako ukon mabuhi!”—2 Sam. 15:6, 18-21.
Mainunungon si Itai kay David nga ginpili ni Jehova bilang hari
Bisan pa indi Israelinhon ang mga Keretnon, ang mga Peletnon, kag ang mga Gathanon, ginkilala nila si Jehova bilang ang matuod nga Dios kag ginbaton nila nga si David ang ginpili ni Jehova. Sigurado nga nagapasalamat gid si David sa sining mainunungon nga mga lalaki.
a Suno sa kasuguan sang Dios nga mabasa sa Deuteronomio 23:3-6, indi puede makasulod sa katilingban sang Israel ang mga Ammonhon kag ang mga Moabnon. Ginapahangop sini nga indi sila puede mangin legal nga pumuluyo sang Israel kag indi sila mahatagan sang tanan nga kinamatarong sang isa ka Israelinhon. Pero kon batunon sang isa ka Ammonhon ukon Moabnon ang matuod nga pagsimba, puede sia makaistar sa Israel kag makapakig-upod sa mga Israelinhon. Tan-awa ang Insight on the Scriptures, Volume 1, p. 95.
