Wust tuu tas?
Warom frëmte mëner im kheenich Tawi sayn militeer ketiint hon
IN TËM kheenich Tawi sayn militeer, waare mëner woo net israeliiter waare. Tsum payxpiil: Selëk te amoniiter, Uriias te hitiiter un Itma te moapiiter. a (1 Kro. 11:39, 41, 46) Tepay am kheenich Tawi sayn militeer, waare aach “ti keretiiter, ti peletiiter un ti kitiiter”. (2 Sam. 15:18) Siits aus tas ti keretiiter un ti peletiiter parente fon te filisteer waare. (Ese. 25:16) Ti kitiiter waare pewooner fon Kat, een filiistix xtat. (Yos. 13:2, 3; 1 Sam. 6:17, 18)
Warom hot Tawi erlaupt tiise frëmte mënxe in sayn militeer tiine? Tee waar sich sicher tas se leaal tsu tëm waare, un hauptseechlich tsu Yeehoowa. Tsum payxpiil, een piiplixe wërter puuch saat iwer ti keretiiter un ti peletiiter: “Tii hon sich troy tsu Tawi kehal in te xweyerste tsayte fon sayn rechiirung.” Wii hon se leaaliteet ketsaycht? Wën “al ti mëner fon Israël” te kheenich Tawi im xtich kelos hon fer “een repëlix man woo Sëpa keheest hot” noo keen, ti keretiiter un ti peletiiter hon sich troy tsu Tawi kehal; tii hon aach keholef Sëpa sayn repelyoon tsum ën pringe. (2 Sam. 20:1, 2, 7) Een aner mool, hot te kheenich Tawi sayn soon, Atoniias, fersuucht kheenich ufm plats fon Salomon wëre. Awer ti keretiiter un ti peletiiter hon sich troy tsu Tawi kehal un hon keholef Salomon wii kheenich in xtele, tee woo Yeehoowa wii te neekste kheenich raus kesuucht hat. (1 Khe. 1:24-27, 38, 39)
Een aner frëmte woo sich fest un leaal tsu Tawi kehal hot, waar Itay te kitiiter. Itay un sayn 600 mëner hon te kheenich Tawi pay kextan wën Tawi sayn soon, Apsaloon, sich repeliirt hot un fersuucht hot kheenich uf Tawi sayn plats wëre. Tawi hot am aanfang fer Itay kesaat tas, wayl eyer een frëmte waar, praycht eyer net fer Tawi khëmpfe. Awer Itay hot keantwort: “Soo sicher wii Yeehoowa leept un soo sicher wiis tuu leepst, mayn hër un kheenich, ekaal woos tuu pist, tat wëre ich, tayn tiiner, aach sin — op es toot orer leepe petayt!” (2 Sam. 15:6, 18-21)
Itay waar leaal tsu Tawi, Yeehoowa sayn kesalpte kheenich
Opwool ti keretiiter, ti peletiiter un ti kitiiter frëmte waare, hon se erkhënt tas Yeehoowa te woere Kot waar un tas Tawi Yeehoowa sayn kesalpte waar. Sicher waar Tawi aarich petanklich wayl eyer tiise troye mëner uf sayn sayt hat!
a Tëm noo Kot sayn kesets in Teuteronoomyum 23:3-6, waare ti amoniiter un ti moapiiter ferpoot in te kemaynt fon Israël rin khome. Awer siits aus tas, opwool se net erlaupt waare teel fon te natsyoon wëre un ale ti rechte fon te israeliiter kriin, waare se net ferpoot mit Kot sayn folek um keen orer pay tëne woone. (Kuk te unerthitel “Casamentos com Israelitas” unich “Amonitas” im puuch Estudo Perspicaz das Escrituras.)
