Nemu Nuan?
Nama kebuah orang ari bansa bukai nyadi soldadu Raja David?
RABAN soldadu Raja David nyengkaum orang ari bansa bukai baka Selek ari Amon, Uriah orang Iti, enggau Itmah ari Moap. a (1 Ban. 11:39, 41, 46) Bala soldadu David mega nyengkaum “orang Keretit, orang Peleti, enggau orang Gat.” (2 Sam. 15:18, NWT) Orang Keretit enggau orang Peleti engka bisi kaul ti rapat enggau orang Pilistin. (Esk. 25:16) Orang Gat berasal ari Gat ba menua Pilistin.—Jos. 13:2, 3; 1 Sam. 6:17, 18.
Nama kebuah David ngemendarka orang ari bansa bukai nyadi soldadu iya? Iya yakin sida setia ngagai iya, sereta ke pemadu penting agi, sida setia ngagai Jehovah. Ambika chunto, bekaul enggau orang Keretit enggau orang Peleti, bup The New Interpreter’s Dictionary of the Bible madahka: “Sida mengkang setia ngagai David, indah ba maya ti pemadu tusah ke kala ditapi David lebuh iya merintah.” Baka ni sida ngereja nya? Lebuh “orang Israel ninggalka David” lalu nitihka “orang siku ti nadai guna, ke benama Sheba,” orang Keretit enggau orang Peleti enda ninggalka David lalu nulung ngetuka pengawa Sheba ke angkat ngelaban. (2 Sam. 20:1, 2, 7) Bisi mega sekali, anak Raja David, Adonijah, nguji deka ngerampas penuduk raja. Taja pia, orang Keretit enggau orang Peleti mengkang setia ngagai David lalu nulung nyiri Solomon, ke udah dipilih Jehovah, nyadi raja pengudah David.—1 Raj. 1:24-27, 38, 39.
Siku agi orang bansa bukai ke amat setia ngagai David, iya nya Itai ari Gat. Itai enggau 600 iku bala soldadu iya nyukung Raja David lebuh anak David, Absalom, angkat ngelaban sereta nguingka ati mayuh orang Israel ngelaban Raja David. Terubah iya, David enda ngasuh Itai belaban ke iya, laban Itai nya orang ari bansa bukai. Tang Itai madahka: ‘Tuan Raja, aku besumpah dalam nama Jehovah, aku deka seruran bejalai enggau nuan, ngagai sebarang endur nuan bejalai, taja pen aku nemu diri deka mati.’—2 Sam. 15:6, 18-21.
Itai setia ngagai David, raja ke dipilih Jehovah
Taja pan orang Keretit, orang Peleti, enggau orang Gat nya orang bansa bukai, tang sida bebasaka Jehovah sebagai Petara ti bendar sereta David sebagai raja ke dipilih Jehovah. David tentu amat beterima kasih laban bisi sida tu ke nyukung iya enggau setia.
a Adat Petara ba Ulang Adat 23:3-6 nangkan orang Amon enggau orang Moap ari nyadi raban nembiak Jehovah. Adat tu engka nagang sida ari nyadi peranak menua nya, tang sida agi ulih begulai tauka diau enggau bala nembiak Petara enti sida nyembah Jehovah. Peda bup Pemahaman Alkitab, Jilid 1, lamb. 107, dalam jaku Indonesia.
