E NWERE ụmụ nwoke na-abụghị ndị Izrel so ná ndị agha Devid, dị ka Zilek onye Amọn, Yuraya onye Het, na Itma onye Moab. a (1 Ihe 11:39, 41, 46) Ndị ọzọ so ná ndị agha Devid bụ ‘ndị Keretaịt, ndị Peletaịt, na ndị Gat.’ (2 Sam. 15:18) O yiri ka ndị Keretaịt na ndị Peletaịt hà bụ ụmụnne ndị Filistia. (Ezik. 25:16) Ọ ga-abụkwa na ndị Gat bụ ndị bibu n’obodo ndị Filistia a na-akpọ Gat.​—Josh. 13:2, 3; 1 Sam. 6:17, 18.

Gịnị mere Devid ji kwe ka ndị a na-abụghị ndị Izrel soro ná ndị agha ya? Ọ bụ n’ihi na obi siri ya ike na ha na-akwado ya. Nke kadị mkpa bụ na ha na-akwado Jehova. Dị ka ihe atụ, otu akwụkwọ na-akọwa Baịbụl kwuru gbasara ndị Keretaịt na ndị Peletaịt, sị: “Ha kwadoro Devid mgbe ihe kacha siere ya ike n’oge ọ bụ eze.” Olee otú ha si kwado ya? Mgbe “ndị Izrel niile” hapụrụ Eze Devid kwadowe “onye isi ike, aha ya bụ Shiba,” ndị Keretaịt na ndị Peletaịt ji obi ha niile kwado Devid ma nyere ya aka ịkwụsị nnupụisi ahụ Shiba nọ na-enupụrụ ya. (2 Sam. 20:1, 2, 7) N’oge ọzọ, nwa Eze Devid aha ya bụ Adọnaịja gbalịrị ịnara ọchịchị nna ya n’ike. Ma, ndị Keretaịt na ndị Peletaịt kwadosiri Devid ike, nyekwara ya aka ichi Solomọn eze, ebe ọ bụ ya ka Jehova họọrọ ka ọ nọchie nna ya.​—1 Eze 1:24-27, 38, 39.

Onye ọzọ na-abụghị onye Izrel, nke kwadosiri Devid ike, bụ Ịtaị onye Gat. Ịtaị na narị ndị dike ya isii kwadoro Eze Devid mgbe nwa ya bụ́ Absalọm nupụụrụ ya isi ma mee ka ndị Izrel megidewe eze. Na mbụ, Devid gwara Ịtaị ka ọ ghara iso lụọ agha n’ihi na ọ bụ onye mba ọzọ. Ma, Ịtaị sịrị ya: “Eji m Jehova, bụ́ Chineke dị ndụ, aṅụrụ gịnwa bụ́ onyenwe m eze iyi na ma n’ọnwụ ma ná ndụ, ohu gị ga-anọ ebe ọ bụla onyenwe m eze nọ.”​—2 Sam. 15:6, 18-21.

N’agbanyeghị na ndị Keretaịt, ndị Peletaịt, na ndị Gat bụ ndị mba ọzọ, ha na-akwanyere Jehova ùgwù maka na ọ bụ ezi Chineke, na-akwanyekwara Devid ùgwù maka na ọ bụ onye Jehova tere mmanụ. Ọ ga-abụrịrị na obi dị Devid ezigbo ụtọ na o nwere ụmụ nwoke ndị a kwadoro ya.