À Jẹ́ la Olẹ?
Ịyẹ tị́ du ká alẹpwụma ịkịla juwa ẹ-ẹpwụ nya alẹwụ nya Adịrahụ iDevidi?
ỊSẸLẸKỊ ọla Amon, Uriya ọla iHiiti, ịTamaa ola iMowabụ, ri angịhyẹ ẹ-ẹpwụ nya alẹpwụma ịkịla ịlẹ kị kaa dẹwụ ha iDevidi. a (1 Ego. 11:39, 41, 46) “Ala iKereti, ala iPeleti, bala ala iGiiti” juwa ẹ-ẹpwụ nya alẹwụ nya iDevidi ịnyịnyị. (2 Sam. 15:18, NW) Ọ lala o-ri ala iKereti bala ala iPeleti nyị bwu yẹẹyẹẹ bala ala iFilisitiya. (Isi. 25:16) Ala iGiiti ịwa bwu epweji nya ịGaatị ọla iFilisitiya.—Joch. 13:2, 3; 1 Sam. 6:17, 18.
Ịyẹ tị́ du ká iDevidi ya iwe da ká angịlịnyị julọọ dẹwụ? Ọ jẹ́ nyori alẹng ịwẹ nyị godayị giri-giri ẹ-ẹga nyamwụ, ọgụgụụgụ ri ẹga nya iJihova. Ọ-chụ pwokwita, ụpwụ ọ-da ịBayịbụụ wụlẹ ọhẹ ya ẹla ọlẹ u-uhye nya ala iKereti bala ala iPeleti: “Ị godayị giri-giri ẹ-ẹga nya iDevidi ẹ-ẹpwụ nya iwe-ahụrụ ọlẹ kọ lujwo gụgụ wuu lụka nya eji ọkpakpa nyamwụ.” Ụ-ụgbẹyị oyina tị́? Ụka ká “ala Isirẹlụ” wuu nyẹẹkpẹ da iDevidi kaka ba “olukpilo ọhẹ . . . kị wụrụ ịChẹba” jẹ, ala iKereti bala ala iPeleti godayị giri-giri ẹ-ẹga nya iDevidi bala ọ-dọọ ụbwọ kụrụ ọngọ la egbeju ọngịrị ọwẹ. (2 Sam. 20:1, 2, 7) Ụka ọhẹ ji ká Adonayịja ọnyị nya iDevidi chanya nyọka hụhụ o-okoji ahụrụ nyamwụ la agbụrụ. Ma ala iKereti bala ala iPeleti godayị giri-giri o-oye nya iDevidi bala ọ-dụbwọ nyọka hu iSolomọn nya adịrahụ, chajị ọwa iJihova à chụ nyọka ri adịrahụ ku ọmwakpa nya iDevidi lẹ.—1 Ịdị. 1:24-27, 38, 39.
Ọngga ọkịla ọlẹ kọ ya ẹta yeji giri-giri ẹ-ẹga nya iDevidi ri Itayị ọla iGiiti. Itayị bala alẹwụ 600 nyamwụ chẹkpẹ ju iDevidi ụka ká Abusalọm ọnyị nyamwụ ji ọkịlẹtụ nya ala Isirẹlụ kpata kpa rụ hi Adịrahụ iDevidi. Ịnọ ụka nya ọgbanyẹ, iDevidi byi Itayị nyori ẹwụ ọwẹ nyị́ ri ịnyamwụ ka chajị nyị ri ọngga. Ma ọ wẹ byoo yẹkẹẹ: “M̀ kpa ẹnyị nya Amkpaa ọlẹ kọ juwa hịhị nwa iro hang ya m̀ ka dịrẹng ka ẹga myị ẹga pyịyọọ, ó-ri ọhịhị lee ó-ri igu.”—2 Sam. 15:6, 18-21.
Itayị godayị giri-giri ha iDevidi ko ri ọngọlẹ ká iJihova ya ida wụ́
Nanana nyori ala iKereti, ala iPeleti, bala ala iGiiti ri angga, ị ye iJihova myị nya Ohe nyịlẹhị bala ọ-jẹ́ iDevidi nya ọngọlẹ ká iJihova ya ida wụ́. Ọ ka myị iDevidi lẹhị lụmẹ nyọlẹ kọ la alẹng ịkpụụ ịlịịwẹ o-oye nyamwụ!
a Ehile nya Ohe ọlụpwụ nya Ehile Ọmada 23:3-6 á myị ọnụ ká ala Amọn lee ala iMowabụ ọlẹlẹhẹ ka jụ ka ẹpwụ nya ọjịra-jịra nya ala Isirẹlụ ka. Ma, ọ lala o-ri ehile ọwẹ pwa ịwa ọ-ka ri ụpa nya ẹpwụma nya Isirẹlụ lụbwọ-lẹta ịnyị, ọ-ọka yẹjulaa lee ọ-ka kụ ẹpwarịrị nya angịnyị nya Ohe ka. Yẹ ụpwụ nya Insight on the Scriptures, Volume 1, ẹbẹ 95.
