Ammoyo Kadi?
Apay nga adda dagiti saan nga Israelita a nagserbi kas soldado ni Ari David?
ITI armada ni Ari David, karaman kadagiti saan nga Israelita a soldadona da Zelek nga Ammonita, Urias a Heteo, ken ni Itma a Moabita. a (1 Cron. 11:39, 41, 46) Karaman met kadagiti soldado ni David dagiti ‘Kereteo, Peleteo, ken Gitita.’ (2 Sam. 15:18) Posible a dagiti Kereteo ken Peleteo ket asideg a kabagian dagiti Filisteo. (Ezek. 25:16) Dagiti Gitita ket nagtaud iti Gat a siudad dagiti Filisteo.—Jos. 13:2, 3; 1 Sam. 6:17, 18.
Apay nga impalubos ni David nga agserbi dagiti saan nga Israelita kas soldadona? Agtalek nga agtalinaedda a napudno kenkuana, ken kangrunaanna, ken Jehova. Kas pagarigan, maipapan kadagiti Kereteo ken Peleteo, kuna ti The New Interpreter’s Dictionary of the Bible: “Nagtalinaedda a napudno ken David iti karirigatan a tiempo ti panagturayna.” Kasano? Adda idi tiempo a “ti amin a tattao ti Israel” pinanawanda ni Ari David tapno suportaranda ti “manangriribuk a ti naganna ket Sheba.” Ngem nagtalinaed a napudno ken David dagiti Kereteo ken Peleteo, ken timmulongda tapno mapasardeng ti panagrebelde ni Sheba. (2 Sam. 20:1, 2, 7) Iti sabali a gundaway, pinadas ni Adonias nga anak ni Ari David nga agawen ti trono ni amana. Nupay kasta, dagiti Kereteo ken Peleteo ket nagtalinaed a napudno ken David ken timmulongda tapno maipatugaw ni Solomon kas ari, ti pinili ni Jehova a sumaruno nga ari.—1 Ar. 1:24-27, 38, 39.
Ti sabali pay a saan nga Israelita a nagtalinaed a napudno ken David ket ni Ittai a Gitita. Sinuportaran ni Ittai ken ti 600 a soldadona ni Ari David idi nagrebelde ni Absalom nga anakna a nangpadas a mangagaw iti puso dagiti tattao tapno tallikudanda ti ari. Imbaga ni David ken Ittai a gapu ta saan isuna nga Israelita, saanna a kasapulan ti makilaban para kenkuana. Ngem kinuna ni Ittai: “Isapatak iti nagan ti sibibiag a Dios a ni Jehova, ken bayat a sibibiagka, apo ari, sumurot kenka daytoy adipenmo iti sadinoman a papanam, uray pay no pakatayak!”—2 Sam. 15:6, 18-21.
Ni Ittai ket napudno ken David, ti ari a dinutokan ni Jehova
Uray no saan nga Israelita dagiti Kereteo, Peleteo, ken Gitita, binigbigda a ni Jehova ti pudno a Dios ken ni David ti dinutokanna. Agyamyaman la ketdi ni David ta naaddaan kadagiti kasta a napudno a kakadua!
a Nairekord iti Deuteronomio 23:3-6 ti linteg ti Dios a mangiparit kadagiti Ammonita ken Moabita a sumrek iti kongregasion ti Israel. Ngem agparang a ti iparparit ti linteg ket ti panagbalinda a legal a miembro ti nasion ti Israel. Nupay kasta, saan nga iparit dayta a linteg a makilangen wenno makipagnaedda iti ili ti Dios. Kitaen ti Pannakatarus iti Kasuratan, Tomo 1, p. 136.
