ERIỌBHE wo deba eyokhọnlẹn nesi Devid. Eso bhọ da ha yi Zilẹk nin obhokhan Amọn, Uraya nin obhokhan Hẹt, bi itman nin obhokhan Moab. a (1 Chron. 11:​39, 41, 46) Ibhokhan Kerat, Pilẹt, bi Gat yẹ ha ribhi ẹwẹ eyokhọnlẹn nesi Devid. (2 Sam. 15:18) Ibhio ibhokhan Kerat bi Pilẹt ha khin rẹji ibhokhan Filistia. (Ezek. 25:16) Asabọmiẹn ghe eji a tiọle Gat bhi agbaẹbho ọsi ibhokhan Filistia, ọle ibhokhan Gat na vae.—Josh. 13:​2, 3; 1 Sam. 6:​17, 18.

Bezẹle nin Devid da ji eriọbhe da ha ribhi eyokhọnlẹn nesọle? Ọle lẹnmhin ghe, ele wo sun rẹkhan ọlẹn. Ọnọn ke okhun nẹ hi, ele sun rẹkhan Jehova. Bhi ọsi ijiẹmhin, rẹji ibhokhan Kerat bi Pilẹt, ọne ebe natiọle The New Interpreter’s Dictionary of the Bible da yọle: “Ele wo sun rẹkhan Devid bhi ẹghe nin emhin rẹ manman nyọn mun ọlẹn beji ọle ha gbẹloghe.” Be ele rẹ lu iriọ yẹ? Ẹghe nin ikpea rebhe ọsi ibhokhan Izrẹl rẹ zẹ Devid obọ dọ rẹkhan ọria esusu natiọle Shiba, ibhokhan Kerat bi Pilẹt da sun rẹkhan Devid, yẹ rẹkpa ọle rẹ khọn Shiba. (2 Sam. 20:​1, 2, 7) Bhi ẹghe ọbhebhe, ọmọn ọsi Devid natiọle Adonaija da ha ho nin ọle re idu-idu rẹ mun ugbẹloghe nọn khẹke Solomọn. Ọkpakinọn, ibhokhan Kerat bi Pilẹt da sun rẹkhan Devid, yẹ rẹkpa re Solomọn kiẹn Ojie ọsi Izrẹl ranmhude ọle hi ọria nin Jehova zẹ.—1 Ki. 1:​24-27, 38, 39.

Ọriọbhe ọbhebhe nọn yẹ manman sun rẹkhan Devid da ha yi Itai nin obhokhan Gat. Itai bi eyokhọnlẹn nesọle ne bun sẹbhi 600 da rẹkpa Devid nin Ojie bhi ẹghe nin Absalọm nin ọmọn nọnsọle rẹ sọtẹ da ọle, yẹ ha ho nin ọle denọ ọkhọle ọsi ikpea ọsi ibhokhan Izrẹl sibhi eji Devid nin Ojie ye re. Bhi ọsi ọhẹnhẹn, Devid da yọle ghe, ọ bha khẹke nin Itai deba ọle bhi ọne okhọn nan ranmhude ọriọbhe ọle khin. Ọkpakinọn, Itai da yọle: “Beji a miẹn Jehova sẹyẹ nyẹnlẹn, sẹyẹ ebeanlẹn mẹn nin ojie sẹyẹ nyẹnlẹn, eji ọ hi ki rẹ khin nin ebeanlẹn mẹn nin ojie diọ i, enin mẹn da yẹ diọ i aharẹmiẹn mẹn dẹ miuhọnmhọn bhọ, la mẹn i da miuhọnmhọn.”—2 Sam. 15:​6, 18-21.

Arẹmiẹn ghe eriọbhe ibhokhan Kerat, Pilẹt, bi Gat ha khin, ele lẹnmhin ghe Jehova hi Osẹ ọsi ẹmhọanta, sẹyẹ, ọria nin Jehova zẹle Devid khin. Ọ dẹ wo manman re Devid ha ghọnghọn rẹ ha mhọn ikpea ne sẹ inian ne wo ha sun rẹkhan ọlẹn!