Jusha nekaata
Davidtia suntarin urukamtai chikich nunkanmayasha pachitkia armia?
Davidtia suntarin Israel aents ainiachusha pachitkia armiayi. Zélec naartinkia Ammonnumiauyayi, Urías naartinkia Het shuarnumiauyayi tura Itmá naartinkia Moabnumiauyayi (1 Crón. 11:39, 41, 46 TNM). a Tura aintsan keretita aents, peletita aentscha nuyasha guitita aentscha Davidtia suntarin pachitkia armiayi (2 Sa. 15:18). Keretita aents nuya peletita aentscha Filisteanmaya aentsjai ni shuar armiayash tumainti (Ezeq. 25:16 TNM). Guititas aentska Filistea nunkanam Gat matsakamunmaya nunia armiayi (Jos. 13:2, 3 TNM; 1 Sam. 6:17, 18 TNM).
Davidcha chikich nunkanmaya aents ni suntarin arat tusa urukamtai iniaisamia? Winiaka penke iniaitiuschartatui tura imiankaska Jehovan tuke umirin ainiawai tu enentaimias ni suntarin pachitkia arat tusa iniaisamiayi. Yuus papiinmania diccionario najanamunam keretitas nuya peletitasnasha aujmatuk junis tawai: Uunt anaikiamu David ti itiurchat nankaamasmiania nui nu aentska ajapa ikiukcharmiayi (The New Interpreter’s Dictionary of the Bible). Nusha itiur nekaaj? Israel aents Davidtian ajapa ikiukiar Seba naartinian nemarkarmiayi tumaitkiusha keretitas nuya peletitas David ii uuntrinti tusar Seban maatai tusar apapektinian yaimkiarmiayi (2 Sa. 20:1, 2, 7). Chikich tsawantincha Davidtia uchiri Adonías naartin uunt anaikiamu ajas ekemtiasa wakerimiayi. Tumaitkiusha keretitas nuya peletitas Davidtian yayainiak Salomón uunt anaikiamu ati tusar anaikiarmiayi (1 Rey. 1:24-27, 38, 39 TNM).
Tura aintsan guitita aents Ittái naartin Davidtian penkesha ajapa ikiukchamiayi. Absalonka uunt anaikiamu ajastasa wakera asa Israel aentsun shiir amajiarmiayi. Ninkia uunt anaikiamu ajastasa wakerimiania nui Ittái 600 suntarjai Davidtian yainkiarmiayi. David Ittái naartinian ameka chikich nunkanmaniaitiatam urukamtai winia ayamprutkatniuitiam tu timiayi. Tumaitkiusha Ittái naartin chicharuk “Yussha iwiaakui tura winia úuntur úunt akupniusha iwiaakui tiniu asan jákatniuitkiui̱sha núja̱i̱ṉchuka iwiaaku pujuttaknasha winia úuntur úunt akupin tui̱ pujuta nui̱ ame takartámniusha pujuttawai” timiayi (2 Sa. 15:6, 18-21).
Jehová Davidtian uunt anaikiamu atatui tiniu asamtai Ittái penkesha ikiukchamiayi.
Keretita aents peletita aentscha nuya guitita aentscha chikich nunkanmaya ainiayat Jehovaka nekas Yuusaiti tu enentaimiarmiayi tura Yuus Davidniaka anaikiaiti tusha enentaimiarmiayi. Davidkia nu aents yayainiamu asa ti shiir enentaimmiayi.
a Deuteronomio 23:3-6 nui Ammonnumia aents nuya Moabnumia aentscha Israel aentsnumka pachitkiachu achartiniaiti tu aarmauyayi. Israel aentsnum pachitkia ataj tuiniaksha nunaka turacharminiuyayi tusa ainis aarmauyayi. Antsu Israel aentsjai warinkish najanawar aujmattsarminiuyayi nuya Israel aentsu nunken nui pujusarminiuyayi. Papii Perspicacia para comprender las Escrituras tana nui Ammonitas aarma ana nui Se casan con israelitas tana nu aujsata.
