Nang Chye Ai Kun?
Hkawhkam Dawi a hpyen dap hta maigan masha ni hpa majaw hpyen magam gun ai kun?
DAWI a hpyen dap hta Amon masha Zelek, Hiti masha Urai, Moba masha Itma zawn re ai maigan masha ni lawm ai. a (1 Hl 11:39, 41, 47) “Hkrehti hte Pelehti masha ni . . . Giti masha” ni mung lawm ai. (2 Sa 15:18) Hkrehti masha ni, Pelehti masha ni gaw Hpilisti ni hte matut manoi nga ai zawn re. (Eze 25:16) Giti mare masha ni gaw, Hpilisti mung Giti mare na re.—Ysh 13:2, 3; 1 Sa 6:17, 18.
Maigan masha ni hpe Dawi hpa majaw hpyen magam gun shangun ai kun? Shi a ntsa, laksan hku nna Yehowa a ntsa sadi dung ai ni re ai hpe kam ai majaw re. Ga shadawn, Hkrehti masha ni, Pelehti masha ni gaw, “Dawi hkaw dung ai laman yak dik htum masa ni hta sadi dung wa ai” ngu Ga Htai Chyum langai hta tsun da ai. Gara hku sadi dung wa ai kun? Dawi Hkawhkam a hpang “Israela nlang” n hkan mat sai sha, “Sheba mying ai nhkru ai wa” hpang hkan mat ai aten hta, Dawi ntsa Hkrehti masha ni, Pelehti masha ni matut sadi dung ma ai. Gumlau ai Sheba hpe hkan rim ya ai. (2 Sa 20:1, 2, 7) Hpang hta, Hkawhkam Dawi a kasha Adoniya hkawhkam aya kashun la na matu shakut ai. Ndai kalang hta mung, Dawi ntsa Hkrehti masha ni, Pelehti masha ni sadi dung ma ai. Hpang hta lung wa na hkawhkam hku nna, Yehowa lata da ai Shawlumon hpe hkawhkam shatai na matu karum ya ai.—1 Hk 1:24-27, 38, 39.
Dawi ntsa grai sadi dung ai maigan masha kaga langai gaw giti masha Itai re. Kasha Absalom gumlau nna Israela ni hpe shi maga lawm wa hkra lau la ai aten hta, Hkawhkam Dawi hpe Itai hte shi a hpyen la 600 madi shadaw ya wa ai. Maigan masha re ai majaw, koi yen mai ai lam Itai hpe Dawi naw tsun ai. Raitim, Itai gaw “Yehowa mung, nang madu hkawhkam wa mung hkrung nga ai hte maren, nang madu hkawhkam wa si hkrung hkrum ai rai tim, lawt lai lu ai rai tim, nang du ai kaw na a mayam wa mung gaja wa du na ring ngai, ngu nna,” tsun ai.—2 Sa 15:6, 18-21.
Karai Kasang namman chya ya ai Hkawhkam Dawi hpe Itai sadi dung
Hkrehti masha ni, Pelehti masha ni, Giti mare masha ni gaw maigan masha ni raitim, Yehowa hpe jet ai Karai hku nna, Dawi hpe Karai Kasang namman chya ya ai wa hku nna hkap la ai. Dai zawn masha ni tinang maga tsap ai majaw, Dawi grai chyeju dum na re.
a Israela masha hpawng hta Amon amyu masha hte Moba amyu masha n mai lawm ai ngu Tara Jahprang 23:3-6 hta hkang da ai. Ndai tara gaw tara shang amyu masha byin wa ai hpe tsun nga ai rai na re. Karai a amyu masha hte maigan masha ni kanawn mazum ai, rau nga ai hpe hkum pat nga ai n re. Dinghkren Mu (Inglik) Volume 1, lm. 95 hpe yu u.
