Ma nakaanaw?
Kʼaʼut wankebʼ aj abʼl tenamit saʼ xyanqebʼ laj puubʼ re laj David?
SAʼ XYANQEBʼ laj puubʼ re laj David wankebʼ li maawaʼebʼ aj Israel, joʼ eetalil, laj Zélec aj Ammon, laj Urías aj Hit ut laj Itmá aj Moab (1 Crón. 11:39, 41, 46). a Wankebʼ ajwiʼ «ebʼ laj Keret, ebʼ laj Pélet […] ut chixjunilebʼ laj Kit» (2 Sam. 15:18). Chanchan tawiʼ naq ebʼ laj Keret ut ebʼ laj Pelet xjunkabʼalebʼ ribʼ rikʼinebʼ laj Filistea (Ezeq. 25:16). Ut ebʼ laj Kit chalenaqebʼ saʼ li tenamit Filistea re Gat (Jos. 13:2, 3; 1 Sam. 6:17, 18).
Kʼaʼut kixkanabʼ laj David naq teʼwanq ebʼ laj abʼl tenamit saʼ xyanqebʼ laj puubʼ? Xbʼaan naq chʼolchʼo chiru naq tiikaqebʼ xchʼool chiru ut chiru li Jehobʼa. Joʼ eetalil, naq nokooʼaatinak chirixebʼ laj Keret ut ebʼ laj Pelet jun li tasal hu li naʼaatinak chirix li Santil Hu naxye: «Ebʼ aʼan xeʼwank chi tiik ru xchʼool chiru laj David naq kixnumsi naabʼal li chʼaʼajkilal saʼ li xʼawabʼejilal». Chanru naqanaw? Naq «chixjunilebʼ laj Israel» xeʼxkanabʼ xjunes laj David re xtaqenkil «jun li winq inkʼaʼ us xnaʼlebʼ, aj Sebá xkʼabʼaʼ», ebʼ laj Keret ut ebʼ laj Pelet xeʼxtenqʼa laj David re xsachbʼal laj Seba li kixqʼet ribʼ (2 Sam. 20:1, 2, 7). Saʼ jun kutan laj Adonías, ralal laj David kiraj kanaak rikʼin li xʼawabʼejilal li xyuwaʼ. Abʼan ebʼ laj Keret ut ebʼ laj Pelet tiikebʼ xchʼool chiru laj David ut keʼtenqʼank re naq laj Salomón twanq choʼq awabʼej, xbʼaan naq nekeʼxnaw naq kisikʼeʼk ru xbʼaan li Jehobʼa (1 Rey. 1:24-27, 38, 39).
Jun chik laj abʼl tenamit li kixkʼutbʼesi xtiikilal xchʼool chiru laj David aʼan laj Ittái aj Kit. Aʼan ut li 600 chi aj puubʼ keʼxtenqʼa laj David naq laj Absalón kixqʼet ribʼ chiru ut kiraj xqʼunbʼesinkil li tenamit re naq teʼxkʼe choʼq awabʼej. Laj David kixye re laj Ittái naq saʼ xkʼabʼaʼ naq aʼan aj abʼl tenamit moko tento ta tpleetiq saʼ xkʼabʼaʼ. Abʼan laj Ittái kixye: «Saʼ xkʼabʼaʼ li yoʼyookil Yos ut saʼ xkʼabʼaʼ laayuʼam ninye aawe naq yalaq bʼar wanqat laaʼat, aran ajwiʼ wanqin laaʼin aj kʼanjel chawu, aʼ yaal ma yoʼyooqat malaj tatkamq aawochbʼeenaqin laaʼin» (2 Sam. 15:6, 18-21).
Laj Ittái tiik xchʼool chiru laj David, li awabʼej li sikʼbʼil ru xbʼaan li Jehobʼa.
Usta ebʼ laj Keret, ebʼ laj Pelet ut ebʼ laj Kit aj abʼl tenamit, nekeʼxpaabʼ naq li Jehobʼa aʼan li tzʼaqal Yos ut nekeʼroxloqʼi laj David joʼ li sikʼbʼil ru xbʼaan li Yos. Relik chi yaal naq laj David naxbʼanyoxi naq wankebʼ winq li tiikebʼ xchʼool re xtenqʼankil.
a Li xchaqʼrabʼ li Yos li wank saʼ Deuteronomio 23:3-6 naxye naq maajun laj Ammon chi moko laj Moab naru twanq saʼ xchʼuut laj Israel. Chanchan tawiʼ naq aʼin naraj xyeebʼal naq moko nekeʼruuk ta wank joʼ tzʼaqal aj Israel. Abʼan nekeʼruuk rochbʼeeninkilebʼ laj Israel ut wank aran. Saʼ li hu Perspicacia para comprender las Escrituras, sikʼ bʼarwiʼ naxye «Ammonitas» ut moqon bʼarwiʼ naxye «Se casan con israelitas».
