Owe shi shiiva tuu?
Omolwashike ovalumenhu ovo vehe fi Ovaisrael va li metangakwaita lohamba David?
METANGWAKWAITA lohamba David omwa li mu na ovalumenhu ovo va li vehe fi Ovaisrael, ngaashi Selek, Omuammoni, Uria, Omuheti nosho yo Itma, Omumoab. a (1 Omaf. 11:39, 41, 46) Metangakwaita laDavid omwa li yo mwa kwatelwa ‘Ovakereti nOvapleti.’ (2 Sam. 15:18) Osha fa shi li ngaha kutya Ovakereti nOvapleti ova li va pambafana filufilu nOvafilisti. (Hes. 25:16) Ovagat ova li ovakalimo vomoshilando shOvafilisti, Gat. — Jos. 13:2, 3; 1 Sam. 6:17, 18.
Omolwashike David a li a pitika ovalumenhu ovo va kale metangakwaita laye? Okwa li e shii kutya ovadiinini kuye, ndele unene tuu kuJehova. Pashihopaenenwa, shi na sha nOvakereti nOvapleti, emboitya limwe lOmbiibeli ola ti: “Ova kala ovadiinini kuDavid, unene tuu meenghalo didjuu, eshi a li ta pangele.” Ongahelipi va ulika kutya ovadiinini kuye? Eshi “ovalumenhu aveshe vaIsrael” va fiya po ohamba David nokushikula “omulumenhu umwe womhote wedina Sheba,” Ovakereti nOvapleti ova kala ovadiinini kuDavid noku mu kwafela a xulife po ounashibofa waSheba. (2 Sam. 20:1, 2, 7) Pomhito imwe, Adonia, omonamati wohamba David, okwa li ta kendabala okuninga ohamba ponhele yaSalomo. Ashike Ovakereti nOvapleti ova kala ovadiinini kuDavid nokukwafela mokuninga Salomo ohamba ya shikula ko, molwaashi oye a li a hoololwa kuJehova. — 1 Eeh. 1:24-27, 38, 39.
Omulumenhu umwe, oo a li ehe fi Omuisrael, oo a li omudiinini kuDavid, okwa li Ittai Omugat. Ittai nosho yo ovakwaita vaye 600 ova li va yambidida ohamba David, eshi omonamati waDavid, Absalom, a li a tukula oshibofa nokwaamuna ko ovalumenhu Ovaisrael vaha shikule ohamba. Potete David okwa li a lombwela Ittai kutya, molwaashi ke fi Omuisrael ita dulu okulwila David. Ashike Ittai okwa ti: “Ohandi ane medina laJehova Kalunga omunamwenyo, kutya ofimbo u na omwenyo omwene wange ohamba, keshe apa omwene wange ohamba to kala, kutya nee otashi pula omwenyo, ile efyo, omupiya woye naye opo ta kala!” — 2 Sam. 15:6, 18-21.
Ittai okwa li omudiinini kuDavid, ohamba yaJehova ya nangekwa po
Nonande Ovakereti, Ovapleti nOvagat kava li Ovaisrael, ova li va fimaneka neenghono Jehova e li Kalunga kashili nosho yo David e li omuvaekwa waJehova. David ka li tuu a pandula okukala e na ovalumenhu ovadiinini va tya ngaho, ovo tave mu yambidida!
a Omhango yaKalunga oyo ya popiwa muDeuteronomion 23:3-6 oya kelela Ovaammoni nosho yo Ovamoab vaha ye meongalo laIsrael. Ashike osha fa shi li ngaha kutya Omhango oyo oya li tai popi okukala omukwashiwana pauyadi nokaya li ya kelela ovanailongo va tya ngaho vaha endafane, ile vaha kale mokati koshiwana shaKalunga. Tala embo o-Insight on the Scriptures, Volume 1, ep. 95.
