DAAVIP sakkutuuisa ilaat Israalik­kuunngillat, soorlu Seleki Ammonimeersoq, Uria Hetikkuusoq aamma Jitma Moabimeersoq. a (Nal 1. 11:39, 41, 46) Aamma ‘kreterit, pleterit Gatimiullu’ Daavip sakkutuuinut ilaapput. (Sam 2. 15:18) Gatimiut filisteriupput, aamma kreterit pleterillu filisterinut atassuser­neqarput naggueqatigiis­sangatin­neqaramik. – Ez 25:16; Jos 13:2, 3; Sam 1. 6:17, 18.

Sooq Daavip Israalik­kuunngitsut sakkutuuminut ilaatis­sinnaavai? Qularin­nginnamiuk ilumoorfigis­sagaanni pingaar­tumillu Jehovamik ilumoorfigin­nissasut. Assersuutigalugu kreterit pleterillu pillugit Biibilimi oqaatsinik qinerlerfissiami ima allassimavoq: “Taakkua Daavi ilumoorfigiuarpaat taassuma naalakkersuinerani pissutsini artornar­nerpaaf­fiusuni.” (The New Interpreter’s Dictionary of the Bible) Taakkua qanoq ersersippaat Daavi ilumoorfigalugu? Israalikkut tamarmik ‘Sheba inupiluusoq’ tapersersor­niarlugu Daavi qimammassuk kreterit pleterillu Daavi ilumoorfigiuarpaat Sheballu pikitsitsineranik unitsitsiniarnerani ikiorlugu. (Sam 2. 20:1, 2, 7) Pisumi allami Daavip ernera Adonija imminut kunngin­ngorteriaraluarpoq. Aamma tassani kreterit pleterillu Daavi ilumoorfigalugu Saalumuumik, Jehovap toqqagaanik, kunngin­ngortitseqataapput. – Kng 1. 1:24-27, 38, 39.

Allamioq alla Daavimik ilumoorfiginnittoq tassaavoq Ittaji Gatimioq. Daavip ernerata Absalomip pikitsitsilluni Israalikkut ‘uummataat tillimmagit’ Ittajip sakkutuunilu 600-t Daavi tapersersorpaat. (Sam 2. 15:6) Daavip Ittaji oqarfigigaluarpaa sorsoqataasariaqan­ngitsoq allamiuugami. Ittajilli ima akivaa: “Ilumut uumammat Naalagaq, ilumullu uumammat naalagara kunngi: Sumiikkaluaruil­luunniit najussavakkit toqutaas­sagaluarumaluunniit!” – Sam 2. 18-21.

Kreterit, pleterit Gatimiullu allamiuugaluarlutik Jehova Guuti ilumoortutuaq ataqqingaarpaat Daavillu Jehovamit kunngin­ngortitaanera upperalugu. Daavip angutinit ilumoorfigin­nittunit taamaattunit tapersersor­neqarnini qujamasuutigingaarsimassavaa!