Ԝә Заньбу?
Чьрʹа Нава Ордийа Даԝьд Пʹадшада Кәсед Хәриб жи Һәбун?
НАВА әскәред Даԝьдда гәләк кәсед жь мьләтед дин жи һәбун, мәсәлә Тсәләке Аммони, Урийайе Һитти у Итмайе Моԝаби a (1 Дирок 11:39, 41, 46). Нава ордийа ԝида әскәред Кәретийа, Пәләтийа у Гати жи һәбун (2 Самуйел 15:18). Дьбежьн кӧ әскәред Кәрети у Пәләти, мәрьвед Фьльстийайә незик бун (Һәзәԛел 25:16). Гати жи бь әʹсьле хԝә жь бажаре Фьльсти, Газайе бун (Йешу 13:2, 3; 1 Самуйел 6:17, 18).
Гәло Даԝьд чьрʹа изьн дабу, кӧ кәсед хәриб бькʹәвьнә нава ордийа ԝи? Чьмки әԝ баԝәр бу, кӧ әԝана һьм ԝирʹа у һьм жь Йаһоԝарʹа амьн ьн. Мәсәлә, фәрһәнгәкеда дәрһәԛа Кәрети у Пәләтийа ӧса те готьне: «Рʹожед һәри чәтьнда ԝәʹде сәрԝертийа Даԝьд, әԝана ԝирʹа амьн ман» (The New Interpreter’s Dictionary of the Bible). Гәло чь щурʹәйи? Гава һʹәму меред Исраеле пьшта хԝә данә Даԝьд Пʹадша у пәй мерәки хьраб, бь наве Шәба чун, Кәрети у Пәләти али Даԝьд кьрьн, кӧ әԝ сәркʹәвә (2 Самуйел 20:1, 2, 7). Ле щарәке жи, гава кӧрʹе Даԝьд, Адонийа, хԝәст тʹәхте баве хԝә зәфти хԝә кә, Кәрети у Пәләти Даԝьдрʹа амьн ман. Бь аликʹарийа ԝана, Сьлеман, йе кӧ бьжартийе Йаһоԝа бу, паши Даԝьд бу пʹадша (1 Пʹадшати 1:24-27, 38, 39).
Иттайе Гати жи хәриб бу, әԝ жи Даԝьдрʹа амьн ма. Гава Абшалом бь аликʹарийа чәнд меред Исраеле һьмбәри баве хԝә Даԝьд дәркʹәт, Иттай у 600 әскәред ԝи, пьштгьрийа Даԝьд Пʹадша кьрьн. Серида, Даԝьд Иттайрʹа гот, кӧ әԝ хәриб ә, ләма жи нәлазьм ә кӧ бона ԝи шәрʹ бькә. Ле Иттай гот: «Хԝәйе мьн пʹадша, бь наве Хӧдане Жиндар у бь сәре хԝәйе хԝә пʹадша сонд дьхԝьн, сах йан мьри, тӧ ль кʹӧ би әз хӧламе тә жи, әзе ль ԝьр бьм» (2 Самуйел 15:6, 18-21, ИМ).
Рʹаст ә, Кәрети, Пәләти у Гати хәриб бун, ле ԝана һʹәсаб дькьр кӧ Йаһоԝа Хԝәдейе рʹаст ә у баԝәр дькьрьн, ԝәки Йаһоԝа Даԝьд ча пʹадша бьжартьбу. Бе шьк, Даԝьд рʹази бу, кӧ кʹеләка ԝи мәрьвед ӧса амьн һәбун.
a Кʹьтеба Ԛануна Дӧщари 23:3-6-да, Ԛануна Хԝәде ԛәдәхә кьрьбу, кӧ Аммони у Моԝаби бькʹәвьнә нава щьвата Исраеле. Ча кʹьфш ә әв йәк дьһатә һʹәсабе, кӧ изьна ԝан тʹӧнәбу бь ԛануни бьбьнә пʹара щьвата Исраелийа, ле изьна ԝан һәбу тʹәви щьмәʹта Хԝәде хәбәр дьн у нава ԝанда бьжин (Бьньһерʹә Фәʹмкьрьна Ньвисаре, Пʹара 1, рʹупʹ. 80).