Udy mumanyikok eeny?
Bwabiny mu basalaay ba Mukaleng Davih mwaakady bakwaabw kabay biin Izaleel?
Mu basalaay ba Davih baakady kabay biin Izaleel mwaakady Selek mwiin Amon, Urih mwiin Itih ni Itumah mwiin Mowaab. a (1 Cif. 11:39, 41, 46) Mu basalaay ba Davih mwaakady cikwaabw “biin Kret, biin Peletiyeh, ni biin Kaat.” (2 Sam. 15:18) Byaakady bimweek neey biin Kret ni biin Peletiyeh baakady malong ni Baafilisiteh. (Ezek. 25:16, NWT) Biin Kaat baakady biin mu cibunj cya Kaat cya Baafilisiteh.—Joz. 13:2, 3; 1 Sam. 6:17, 18.
Bwabiny Davih wiitabil bwa baat aab biikal mu basalaay bindiy? Bwaal waakady mujaadik neey baat aab baakady mwa kwiikal ni lulamat kudyey ni kudy Yehow. Cileejel, habitaatal biin Kret ni biin Peletiyeh, Diksiyoneer dikwaabw dya myand ya mu Bibl dileeleeb neey: “Bashaadil ni lulamat kudy Davih mu biisang bikasakan bya bukaleng bwindiy.” Mu mushind kaay? Haakady “biin Izaleel boos” bashiy Mukaleng Davih ni balond “Sheba,” biin Kret ni biin Peletiyeh bashaadil ni lulamat kudy David ni bamwambulwiishil bwa kwimanyik buntomboj bwaakady Shebah mutang. (2 Sam. 20:1, 2, 7) Musang mukwaabw, Adoniyah mwaan a Mukaleng Davih ukaamin kwangat bukaleng ku bukol. Ki biin Kret ni biin Peletiyeh bashaadil teng ni lulamat kudy Davih ni bamwambulwiishil bwa kuteekey Salomon mukaleng waakady Yehow musungul bwa kumuhyaan.—1 Bak. 1:24-27, 38, 39.
Muut mukwaabw waakady kay mwiin Izaleel ushaadil ni lulamat lukasakan kudy Davih, i Itaayih mwiin kaat. Itaayih ni basalaay bindiy 600 bambulwiishiil Mukaleng Davih haakady Abusalom mwaan a Davih mumutombokel ni musak baat bwa kumulondobw yiy hamut ha Davih. Davih wambiil Itaayih neey bu mwaakadyey kay mwiin Izaleel, kaakadyoh bend mwa kumulwiishok diivit. Ki Itaayih umwambiil neey: “Bu mudy Mawej [Yehow] ni buumy ni uw byeeb mwiikal ni buumy, niiciicih, a fumwaany ney: koos kuwaakiikal aak, i kuk kuniikaakal byaany, bwa kufw eecy kwiikal neeb!”—2 Sam. 15:6, 18-21.
Itaayih waakady ni lulamat kudy Davih, mukaleng munoonoh kudy Yehow
Ning mwaakady biin Kret, biin Peletiyeh ni biin Kaat kabay biin Izaleel, baakady bamanyik neey Yehow i Mawej a biin-biin ni Davih waakady muut musungul kudy Yehow. Davih waakady ni dyanyish bwa mwaakadyey ni baan-balum ba lulamat aab!
a Mukenj udy mu May Mumbulul 23:3-6 waakady ulekesh bwa biin Amon ni biin Mowaab kutweelobw mu cisumbw cya biin Izaleel. Ki bimweemweek neey mukenj oow, waakady utal muut waakady ukaam kushaal mwiin Izaleel, ki kaakady ulekesh biin Izaleel bwa kudy naab bulund eecy bwa baat aab kushikatobw mukacy mwa baat ba Mawej. Tal mukand a Étude perspicace des Écritures, Volim 1, dib. 95.
