Wunalhue Wasi?
Busana naki omwa mahe w’Omwami Dawudi mwabya n’abalhume abathabya Baisraeli?
ABAGHUMA b’okwa balhwi mbangyi ab’ehandi ababya omwa mahe wa Dawudi ni Zeleki Omuamoni, Uria Omuhiti, na Itima Omumoabu. a (1 Emy. 11:39, 41, 46) Omwa mahe wa Dawudi mwabya ‘Abakereti, Abapeleti, n’Abagiti.’ (2 Sam. 15:18) Abakereti n’Abapeleti ibasibwe ng’abawithe obuhughu bw’ahakuhi n’Abafilisitini. (Eze. 25:16) Obundi Abagiti babya bikalhani b’omuyi we Filisitini e Gati.—Yos. 13:2, 3; 1 Sam. 6:17, 18.
Ni kyahi ekyangabya iky’ekyaleka Dawudi iniahira abalhume ab’ehandi ng’aba omwa mahe wiwe? Aby’ayikethere ngoku ni bathaleghulha okw’iyo, kandi ekikulhu kutsibu, oku Yehova. Ng’eky’erileberyako, bikahika okwa Abakereti n’Abapeleti, ekitabu The New Interpreter’s Dictionary of the Bible kikabugha kithi: “Mubasighalha bathaleghulha oku Dawudi omwa mighulhu eyikalire omwa buthuku bw’erithabalha liwe.” Bathi? Omughulhu “abandu bosi be Israeli” basighanaya Omwami Dawudi n’erikwama “omundu muthya-muthya erina liwe iyo Seba,” Abakereti n’Abapeleti mubamakirira Dawudi kandi bamawathikya okw’ighunzaho eriyisamambulha eryo Seba atsukisaya. (2 Sam. 20:1, 2, 7) N’okwa bundi buthuku, mughalha w’Omwami Dawudi iya Adonia mwanza eriyimirya ekithumbi ky’obwami. Aliwe kandi, Abakereti n’Abapeleti mubathaleghulha oku Dawudi kandi mubawathikya okw’iyira Solomona mwa mwami, oyo Yehova abya iniabirisombolha, ng’oyukendi suba okwa kithumbi ky’obwami.—1 Bam. 1:24-27, 38, 39.
Owundi mulhume w’ehandi oyuwasighalha muthaleghulha oku Dawudi ni Itai Omugiti. Itai n’abalhume biwe 600 abalhwi mbangyi mubasighika Omwami Dawudi omughulhu mughalha wiwe ya Abusaloma ayisamambulha n’eribindulha emithima y’abandu be Israeli erilhua oko mwami. Okw’itsuka, Dawudi mwabwira Itai athi kundi iyo ni w’ehandi, syatholere erimulhwirako. Aliwe Itai mwabugha athi: “Ngoku Omwami Mukulhu aliho, kandi ngoku omukama waghe omwami aliho, kwenene aho omukama waghe omwami asyabya, nomulyangabya iholha, kutse eribyaho, ha n’aho omughombe wawu asyabya!”—2 Sam. 15:6, 18-21.
Itai mwathaleghulha oku Dawudi, omwami omuhakabibwa wa Yehova
Nomwakine indi Abakereti, Abapeleti, n’Abagiti babya b’ehandi, babya ibanasi ngoku Yehova ya Nyamuhanga w’okwenene na Dawudi ku y’omuhakabibwa wa Yehova. Dawudi k’atholere eribya imwasima kutsibu eribya n’abalhume bathaleghulha ng’abo abamusighika!
a Ekihano kya Nyamuhanga ekiri omwa Eryibuka Ebihano 23:3-6 ikikathanga Abaamoni n’Abamoabu eringira omwa kithunga kye Israeli. Aliwe, kikabya ekihano eki nga kyabya kikakania okw’ibya mughuma w’okwa kihanda erikwamana n’ebilhaghiro kandi isikirithanga ab’ehandi abo okw’ikolongana kutse eribya haghuma n’abandu ba Nyamuhanga. Lebaya Insight on the Scriptures, Volyumu 1, olhup. 95.
