Yu Bin No?
Wetin mek fɔrina dɛn bin de na Kiŋ Devid in ami?
INSAY Devid in ami, man dɛn bin de de we nɔto bin Izrɛlayt dɛn. Fɔ ɛgzampul, Zilɛk we na bin Amɔnayt, Yuraya we na bin Itayt, ɛn Itama we na bin Moabayt bin de na in ami. a (1 Kro. 11:39, 41, 46) Devid bin gɛt man dɛn bak we na bin “Kɛritayt dɛn, Pɛlitayt dɛn, ɛn Gitayt dɛn.” (2 Sam. 15:18) I tan lɛk se di Kɛritayt ɛn di Pɛlitayt dɛn bin gɛt tayt padi biznɛs wit di Filistin dɛn. (Izi. 25:16) Di Gitayt dɛn kɔmɔt na Gat we na bin wan pan di Filistin dɛn siti dɛn.—Jɔs. 13:2, 3; 1 Sam. 6:17, 18.
Wetin mek Devid bin alaw dɛn fɔrina dɛn de fɔ de na in ami? I bin gɛt kɔnfidɛns se dɛn nɔ go kɔmɔt biɛn am ɛn wetin impɔtant pas ɔl na dat dɛn nɔ go kɔmɔt biɛn Jiova. Fɔ ɛgzampul, we wan Baybul dikshɔnari bin de tɔk bɔt di Kɛritayt ɛn Pɛlitayt dɛn, i bin se: “Dɛn bin kɔntinyu fɔ de biɛn Devid di tɛm we tin bin tranga fɔ am we i bin de rul.” Aw dɛn bin sho se dɛn nɔ de kɔmɔt biɛn Devid? We “ɔl di man dɛn na Izrɛl” lɛf fɔ fala Kiŋ Devid fɔ fala ‘wan man we nem Shiba we bin de kɔz trɔbul,’ di Kɛritayt ɛn Pɛlitayt dɛn bin kɔntinyu fɔ de wit Devid ɛn dɛn bin ɛp am fɔ pwɛl Shiba in plan. (2 Sam. 20:1, 2, 7) Wan ɔda tɛm, Kiŋ Devid in bɔypikin we na Adonayja bin tray fɔ bi kiŋ pan ɔl we na Sɔlɔmɔn bin fɔ bi kiŋ. Bɔt di Kɛritayt ɛn Pɛlitayt dɛn bin kɔntinyu fɔ de biɛn Devid ɛn dɛn bin ɛp fɔ mek Sɔlɔmɔn bi kiŋ bikɔs na in Jiova bin dɔn pik fɔ bi kiŋ afta Devid.—1 Kiŋ 1:24-27, 38, 39.
Wan ɔda fɔrina we bin rili kɔntinyu fɔ de biɛn Devid na Itay we na bin Gitayt. Itay ɛn in 600 fɛtman dɛn bin sɔpɔt Kiŋ Devid we in bɔypikin Absalɔm bin tɔn agens am ɛn tray fɔ mek di pipul dɛn na Izrɛl mek am kiŋ. Devid bin tɛl Itay se bikɔs in na fɔrina i nɔ nid fɔ fɛt fɔ am. Bɔt Itay bin tɛl am: “As lɔng as Jiova de alayv ɛn as lɔng as mi masta di kiŋ de alayv, ɛnisay we mi masta di kiŋ de ilɛk yu day ɔ yu de alayv, na de yu savant go de!”—2 Sam. 15:6, 18-21.
Itay bin kɔntinyu fɔ de biɛn Devid we Jiova bin dɔn pik fɔ bi kiŋ
Pan ɔl we di Kɛritayt, Pɛlitayt, ɛn Gitayt dɛn na bin fɔrina dɛn, dɛn bin biliv se Jiova na di tru Gɔd ɛn na Devid i dɔn pik fɔ bi kiŋ. Wan dawt nɔ de se Devid bin gladi fɔ gɛt dɛn kayn man dɛn ya we nɔ bin de kɔmɔt biɛn am!
a Gɔd in lɔ we dɛn rayt na Ditarɔnɔmi 23:3-6 nɔ bin de alaw Amɔnayt ɛn Moabayt dɛn fɔ de wit di Izrɛlayt dɛn. Bɔt i tan lɛk se dis lɔ bin min se dɛn nɔ go gɛt ɔl di rayt dɛn we Izrɛlayt fɔ gɛt, bɔt dɛn kin miks wit Gɔd in pipul dɛn ɛn de wit dɛn. Luk Insight on the Scriptures, Vɔlyum 1, pej 95.
