A Sina Pa?
Le yɛɛ puaa ve Isɔluɛiyaa le wa, wa yɛ puaa chɔuwaa Masaa Deeve wa tɛɛŋ?
PUAA ve Isɔluɛiyaa le wa wa puaa chɔuwaa Deeve wa tɛɛŋ. Mɛɛ Sɛlɛki wana waa Amɔŋ, Yulaya Hitaitiinɔɔ, a Itimaa fulaa Mowaabi cho nuaa yɛ. a (1 Kolo. 11:39, 41, 46) Nduyɛ “Kɛluitaitiiya, Pɛlɛtaitiiya a Kitaitiiya” wa vɛlɛ puaa nduaa chɔuwa tɛɛŋ. (2 Saam. 15:18) Wana che pɛ maa, Kɛluitaitiiya a Pɛlɛtaitiiya wa o wanayɛi kpɛɛluŋnde niŋ a Filitiaŋnda. (Isi. 25:16) Nduyɛ, o chioo Kaati niŋ Kitaitiiya ndaa fula ni.—Chɔɔ. 13:2, 3; 1 Saam. 6:17, 18.
Le yɛɛ Deeve chɛllɛ mi puaa ve Isɔluɛiyaa le wa, wa puaa nduaa chɔuwa tɛɛŋ? Kanifuule, ndoo nɔ tiindaŋndo maa, a cho ndu lo lechoo wo chɔm. Nduyɛ i hiou kpou ve, a wa lo lechoo wo chɔm o Chɛhowa lo. Le tamaseliiyo, mi yau pilɛ tɛɛsiaa a Baabuiyo okɔɔ wo dimi a Kɛluitaitiiya vɛlɛ a Pɛlɛtaitiiya okɔɔ aa: “Mi puaa haa chɔm lo lechoo wo o Deeve lo, a teleŋ kala kalaa o masale ndɔleŋ niŋ.” Vɛɛ nda tosa yɛ keŋ? Baabuiyo dimi maa, mɛɛ “puaa Isɔluɛiya kpou faŋaŋ Deeve kɔɔli,” ma tual Siɛba “wana mɛliaa ŋsɔɔ kɔɔli,” mi Kɛluitaitiiya a Pɛlɛtaitiiya chɔm lo lechoo wo o Deeve lo, nduyɛ ma mala ndu le po nila kalu koŋ chɔulabaa. (2 Saam. 20:1, 2, 7) A teleŋ cheleŋ, mɛɛ po Masaa Deeve wo Adonicha kindiŋ le mbo simnuŋ masaa, mi Kɛluitaitiiya a Pɛlɛtaitiiya chɔm vɛlɛ lo lechoo wo o Deeve lo, le Sɔlɔmɔŋ siiŋguuwo masaa. Nduyɛ, ndu kpeekpei Chɛhowa ndoo hɛli ni le mbo miiŋgu o masaleŋ choo.—1 Masaa. 1:24-27, 38, 39.
Wana cheleŋ chɔm vɛlɛ lo lechoo wo o Deeve lo, mi che bɛɛ o ve Isɔluɛinɔ le wo wa Itai wana waa Kaati ni. Mi ndu nda puaa nduaa chɔuwaa 600 toolu Masaa Deeve mɛɛ po ndɔɔ Abisalɔŋ tosal ndu nilakalulaŋ, nduyɛ mbo wa kindiŋndo le puaa Isɔluɛi kɔltaŋ mulioo, le ma simul masaa. O tasela ndɔ, mi Deeve dimul Itai maa, le mɛɛ o cho Isɔluɛinɔ le yɛ, o chɔulaba le ndu le. Kɛ mi Itai dimi aa: “I mɛnaŋ po o Chɛhowa, Mɛlɛka cho yoomu wo lo maa te num masanɔ nuu cho pɛ yoomu, ba o ba ŋ wa pɛ, loŋ ya buɛi numndo cho wa ni, o yɔŋ bɛɛ aa le piɔmndo ɔɔ le waa yoomu!”—2 Saam. 15:6, 18-21.
Mi Itai chɔm lo lechoo wo o Deeve lo kanifuule, ndu Chɛhowa ndoo pɔya ni le mbo wa masaa
Mi che bɛɛ Kɛluitaitiiya, Pɛlɛtaitiiya a Kitaitiiya ve Isɔluɛiyaa le, kɛ ndaa sina maa Mɛlɛka tonyaa Chɛhowa cho ni, vɛlɛ maa Deeve o pɔya ni. A tonya, mi Deeve naŋ kɔl tau le mɛɛ puaa kaŋ chɔm ndu lo lechoo wo yɛ.
a Mi sawala cho o Ditɔnɔmii 23:3-6 niŋndaŋ la kuuna Amɔnaitiiya a Mowabaitiiya luɛiyɔɔ Isɔluɛiya tɛɛŋ. Hei sim ni maa, mi sawala laŋ la kuuna nda simnɔŋndo pilachieeya Isɔluɛiya tɛɛŋ. Kɛ la kuuna nda wanaa Mɛlɛkaa holnɔŋndo ɔɔ waa nda tɛɛŋ te. Tofa yauwo hoo, Insight on the Scriptures, Volume 1, peele 95.
