SELEKE wa Nyamone, Uriya wa Nkete yo Yitema wa musi Moabe a i akaka muna anzenza bakala muna vu kia makesa ma Davidi. (1 Tus. 11:39, 41, 46) Muna vu kia makesa ma Davidi mwakala mpe ye “Akerete, Apelete ye Angati.” (2 Sam. 15:18) Ditoma monekanga vo Akerete ye Apelete lukufi bakalanga ye Afelesetia. (Yez. 25:16) Angati mu mbanza Ngati ya Afelesetia batuka.—Yos. 13:2, 3; 1 Sam. 6:17, 18.

Ekuma Davidi kakotesela anzenza muna vu kia makesa mandi? Wakala ye vuvu vo anzenza besikila ye kwikizi muna yandi, musungula kwa Yave. Muna bonga e nona, nkanda mosi uvovanga mu kuma kia Akerete ye Apelete vo: “Basikila ye kwikizi kuna kwa Davidi muna ntangwa yasunda e mpasi muna kintinu kiandi.” Aweyi bavangila wo? Vava “Aneyisaele awonso” bayambula Davidi wa ntinu yo landa ‘kimpumbulu kimosi, e nkumbu andi Seba,’ Akerete ye Apelete bayikama Davidi ye bansadisa muna fokola ukolami wa Seba. (2 Sam. 20:1, 2, 7) Vakala diaka ye ntangwa ina Adoniya wa mwan’a Davidi kavava kutumuna e Kintinu. Kansi, Akerete ye Apelete basikila ye kwikizi kwa Davidi ye bansadisa mu yadika Solomo ona Yave kasola kimana kavinga vana kunda kia kimfumu.—1 Nti. 1:24-27, 38, 39.

O nzenza wankaka ona wasikila ye kwikizi muna Davidi i Itai wa Ngati. Itai ye 600 za makesa mandi basadisa Davidi wa ntinu vava Abesalome wa mwan’a Davidi kantelamena yo vukumuna nkangu a Isaele kimana batelamena o ntinu. Wau vo Itai nzenza kakala, kuna lubantiku Davidi wamvovesa vo kayambula nuana. Kansi, Itai wavova vo: “Ndidi e ndofi muna Yave wa Nzambi amoyo, yamuna moyo aku e ntinu, konso fulu kina kikala o mfumu ame wa ntinu, kana mu lufwa yovo mu moyo, i kûna mpe kukala selo kiaku!”—2 Sam. 15:6, 18-21.

Kana una vo Akerete, Apelete ye Angati anzenza bakala, bazaya wo vo Yave i Nzambi a ludi, o Davidi i kuswa kia Yave. Ka lukatikisu ko vo Davidi wavutula matondo kwa akwa kwikizi awaya bakwamanana ku sambu diandi.