Ngano wa wazaba?
Mu bungu dia nti binwani bia mutinu Davide biabêla na banzenza mu kati?
MU KATI dia binwani bia Davide, Zeleke wabâ mô, yandi wabâ Amonite, Uriya wabâ Hitite na Itma wabâ Moabite. a (1 Nta. 11:39, 41, 46) Mu binwani bia Davide mweri mpe na “Bakeretite, Bapeletite na Bagitite.” (2 Sam. 15:18) Bantu beri banzaka ti Bakeretite na Bapeletite kanda babâ na Bafiliste. (Ezk. 25:16) Bagitite, ku hata dia Bafilste di beri tâka nkumbu Gate, batûka.—Yos. 13:2, 3; 1 Sam. 6:17, 18.
Mu bungu dia nti Davide kakotesela banzenza mu binwani biandi? Lukwikulu lwabâ nandi ti bawu ba kwikama babâ kwe yandi, mpe wuyôkele mfunu, ba kwikama babâ kwe Yehova. Mu tifwani, mu bungu dia Bakeretite na Bapeletite, mukanda wa The New Interpreter’s Dictionary of the Bible wutêle: “Bawu batatamana mu bâ ba kwikama mu misamu mia nkatika mpasi mia luyâlu lwa Davide.” Ngano bwe? “Babakala babansoni ba ku Israele” bu bayambirika Davide mu landa “timpumbulu ti beri tâka nkumbu Seba,” Bakeretite na Bapeletite batatamana mu bâ ba kwikama kwe Davide, mpe bahana lubakusu lwawu mu sukisa bukolo bwa Seba. (2 Sam. 20:1, 2, 7) Tilumbu tiakaka, mwana wa mutinu Davide, Adoniya, wayêla mu wuka timfumu. Kâ, Bakeretite na Bapeletite batatamana mu bâ ba kwikama kwe Davide, mpe bahana lubakusu lwawu mu zakasa Salomo ha timfumu, muntu wa sola Yehova mu bâ mutinu ha manima ma Davide.—1 Mit. 1:24-27, 38, 39.
Nzenza yakaka yatatamana mu bâ wa kwikama kwe Davide ni Itaye, wabâ Gitite. Itaye na binwani biandi 600 bahana lubakusu kwe mutinu Davide, mwana’andi Absalome bu kamukolamana, mpe bu katuma mitima mia babakala ba ku Israele mu telamana mutinu. Ntete Davide watâ kwe Itaye ti mu bungu ti yandi nzenza yabâ, mvita ka zabâ za yandi ko. Kâ Itaye watâ: ‘Ndefi ni Yehova we moyo na mutinu mfumu’ani we moyo, mu bungu ti ha mbuka yilendi bâ mfumu’ani mutinu, tala fwa tala vûka, tisari tiaku ni hana kabâ!’—2 Sam. 15:6, 18-21.
Itaye ya kwikama wabâ kwe Davide, mutinu wa sola Yehova
Ni bu sa ti Bakeretite, Bapeletite na Bagitite nzenza zabâ, kwe bawu Yehova Nzambi ya matieleka yabâ, mpe Davide ni muntu wa sola Yehova. Diangana Davide matondo mamingi keri vutulaka bu kabâ na bantu ba mpila yo ha lweka lwandi!
a Musiku wa Nzambi we mu Lubambu 23:3-6 wayimina mu kotesa Ba-Amonite na Bamoabite mu timvuka tia Israele. Kâ, kampe musiku wo kanda dia mukaka weri tarilaka, mpe ka weri’â yiminaka ko kwe muna muntu mu bâ tintwari na kanda dia Nzambi peleko mu bâ ha kati diawu. Tala Étude perspicace des Écritures, Volume 1, tin. 100.
