Sa Mulicishi?
Ino nceebonshi baswamashi bamwi bakalinga kusebensa mulikoto lya bashilumamba bakwe Defedi?
BASANKWA bamwi baswamashi bakalinga mulikoto lya bashilumamba bakwe Defedi baleelikaawo Seleki mwine Amoni, Uliya mwine Iti, alimwi a Itima mwine Moabu. a (1 Maka. 11:39, 41, 46) Alimwi mulikoto lya bashilumamba bakwe Defedi mwakalinga a “bene Kileti boonse, bene Pileti boonse alimwi abene Giti boonse.” (2 Samwe. 15:18, NWT) Citoboneka ayi bene Kileti abene Pileti bakalinga kunyumfwana abuumbi a bene Filisiti. (Esek. 25:16) Bene Giti mbantu bakalinga kukala mundabala ya bene Filisiti ya Gati.—Joshu. 13:2, 3; 1 Samwe. 6:17, 18.
Ino nceebonshi Defedi wakasuminisha basankwa aba kuba mulikoto lya bashilumamba bakwe? Wakalinga kushomete ayi bakalinga kushomeka kuli nguwe, alimwi ciinditeewo bakalinga kushomeka kuli Yehova. Kucakubonenaako, dikishonali imwi isansulula makani amu Baibo yakaamba pa bene Kileti abene Pileti ayi: “Defedi ndyaakalinga kweendelesha, bakatolelela kushomeka kuli nguwe paciindi ndyaakalinga mubukaalo buyumu abuumbi.” Ino bakatondesha buyani ayi bakalinga kushomeka kuli nguwe? “Basankwa bene Isilaeli boonse” ndyebakamushiya Defedi akutalika kukonkela “cikwapululwa ca muntu wiitwa ayi Sheba,” bene Kileti abene Pileti bakatolelela kushomeka kuli Defedi alimwi bakacafwilisha kuboosha bantu kuli Defedi abo bakalinga kukonkela Sheba. (2 Samwe. 20:1, 2, 7) Paciindi cimwi, Adonija mwanaakwe Defedi wakalinga kusuni kulibika pa bwaami muciindi cakwaamba ayi Solomoni abe nguwe mwaami. Nacibi boobo, bene Kileti abene Pileti bakatolelela kushomeka kuli Defedi akucafwilisha kwaamba ayi Solomoni abe mwaami mukwiinga Yehova ngwaakalinga wasala kupyana baishi pa bwaami.—1 Baam. 1:24-27, 38, 39.
Muswamashi aumwi wakatolelela kushomeka abuumbi kuli Defedi ngu Itayi mwine Giti. Itayi abashilumamba bakwe bali 600 bakacafwa Mwaami Defedi, Abusalomu mwanaakwe Defedi ndyakapondoka akutalika kuyunga basankwa bene Isilaeli kwaamba ayi bakonkele nguwe. Defedi wakalwiita Itayi ayi, mukwiinga wakalinga muswamashi, taakalinga kweelete kwaabanamo lubasu kulwana nkondo iyi. Sombi Itayi wakaamba ayi: ‘Bweenka mbocibete lushinisho ayi Yehova ngumuumi, alimwi ayi mwebo nkambo nobaami bangu muli boomi, ncakwiila anebo nemusebenshi wanu ntooya kuli koonse mwebo nkambo nobaami bangu nkweshi muye nacibi kwaamba ayi cilaamba buumi nabi lufu!’—2 Samwe. 15:6, 18-21.
Itayi wakalinga kushomeka kuli Defedi, mwaami Yehova ngwaakasala
Nabi kwaamba ayi bene Kileti, bene Pileti abene Giti bakalinga baswamashi, bakalinga kucishi ayi Yehova ngo Lesa wancine alimwi ayi Defedi ngu mwaami wakasalwa a Yehova. Ncakutatoonsha kwaamba ayi Defedi wakalumba abuumbi pakuba abasankwa aba bakalinga kushomeka kuli nguwe!
a Mulawo wakwe Lesa ucanika pa Dutolonomi 23:3-6 wakalinga kukasha bene Amoni abene Moabu kuba pakati ka bene Isilaeli. Nacibi boobo, citoboneka ayi mulawo uyu wakalinga kwaamba pabaabo bakasuminishikwa kuba bene Isilaeli kweelana amulawo alimwi tawakalinga kukasha baswamashi aba kukala na kucanika pomwi abene Isilaeli na batalika kulambila Lesa wancine. Amubone libuku lyamu Cisungu lyaamba ayi Insight on the Scriptures, Volyumu 1, pe. 95.
