Nawˬ shiˍ˗aˬ laˇ?
Aˬ htoꞈ ma te buiˇ shaˆ aˉ naˆ chaw jawˇ mawˇ Daˍviˆ ve maꞈ yaˇ te ve le?
Daˍviˆ ve maꞈ yaˇ laiˉ gʼaˇ buiˇ shaˆ aˉ naˆ chaw hpehꞈ ve yoˬ. Tawˇ pa haˉ te kʼo, Aˍmonˍ chaw Zeˍlehˆ, Hiˇtiˆ chaw Uˇriˆyaꞈ, leh Mawˇbaˆ venˇ yaˇ Iˉtaˍmaˍ a hui hpehꞈ ve yoˬ. (1 Raˍsaˍvanˍ 11:39, 41, 46) Chi hkʼoˆ kaꞈ, Daˍviˆ ve maꞈ yaˇ ‘Hkeˍraˍtiˆ chaw, Peˍlaˍtiˆ chaw teˇ hpaˍ leh Gaˍtaˆ venˇ yaˇ hui hpehꞈ ve yoˬ.’ (2 Saˍmo˗eˍlaˆ 15:18) Nyi˗a kʼo, Hkeˍraˍtiˆ chaw, Peˍlaˍtiˆ chaw Hpiˇliˇtiˆ chaw htaꞈ meuˆ daꞈ ve yoˬ hehˉ. (Yeˍsaˍkeˍlaˆ 25:16) Gaˍtaˆ venˇ yaˇ maˇ˗awˍ ve kʼo, Hpiˇliˇtiˆ mvuhˇ miˬ lo hpaw la taˍ ve yoˬ.—Yawˇsuˆ 13:2, 3; 1 Saˍmo˗eˍlaˆ 6:17, 18.
Aˬ htoꞈ ma te Daˍviˆ buiˇ shaˆ aˉ naˆ chaw htaꞈ yawˇ ve maꞈ yaˇ te tcuh ve le? Awˬ lawn kʼo, chaw chi teˇ hpaˍ lehˬ yawˇ htaꞈ ka tiꞈ yeˬ tuˬ yoˬ tehꞈ yawˇ yonˍ gʼa leh a yeˇ uiˍ jaˇ ve lehˬ, Yaˬhoˉvaˬ htaꞈ ka tiꞈ yeˬ tuˬ yoˬ tehꞈ kaꞈ yawˇ yonˍ gʼa ve yoˬ. Tawˇ pa haˉ te kʼo, Liꞈ hpu teˇ kʼoˆ hkʼaw Hkeˍraˍtiˆ chaw, Peˍlaˍtiˆ chaw hui htaꞈ kʼoˆ taˍ ve, “Daˍviˆ tuꞈ ve hkanˍ ve gʼa hpuˇ ve awˬ yanˇ htaˇ, yawˇ hui Daˍviˆ htaꞈ ka tiꞈ yeˬ ve yoˬ.” Aˬ htoꞈ ma pa taw, yawˇ hui chi hkʼe te ve le? Iˉsaˍreˍlaˆ chaw Daˍviˆ hpawˇ lo maˇ chehˇ leh Sheˍbaˆ hpawˇ lo chehˇ kʼai ve pa taw, “haiˬ ve chaw teˇ gʼaˇ cawˬ ve yoˬ.” Hkeˍraˍtiˆ chaw, Peˍlaˍtiˆ chaw hui Daˍviˆ htaꞈ ka tiꞈ yeˬ leh, Daˍviˆ Sheˍbaˆ htaꞈ gʼa kʼoˬ piˇ tuˬ ga piˇ ve yoˬ. (2 Saˍmo˗eˍlaˆ 20:1, 2, 7) Teˇ pawˆ htaˇ Daˍviˆ ve yaˇ paˍ Aˍdawˉniˍyaˆ yawˇ awˬ paˍ ve awˬ tan jawˇ mawˇ te gaˇ ve yoˬ. Hkeˍraˍtiˆ chaw, Peˍlaˍtiˆ chaw hui Daˍviˆ htaꞈ hkʼaˬ htaˆ kaꞈ ka tiꞈ yeˬ leh Daˍviˆ ve awˬ tan Yaˬhoˉvaˬ leuˆ yuˬ taˍ ve Sawˉlaꞈmonˍ jawˇ mawˇ te tuˬ yawˇ hui ga piˇ ve yoˬ.—1 Jawˇmawˇ 1:24-27, 38, 39.
Buiˇ shaˆ aˉ naˆ chaw Daˍviˆ htaꞈ ka tiꞈ yeˬ ve teˇ gʼaˇ lehˬ, Gaˍtaˆ venˇ yaˇ Iˆtehˇ hpehꞈ ve yoˬ. Iˆtehˇ leh yawˇ ve maꞈ yaˇ 600 gʼaˇ jawˇ mawˇ Daˍviˆ ve yaˇ Aˍbaˆsaˍlonˍ Daˍviˆ htaꞈ hpfuhˆ htaˇ, yawˇ hui ga piˇ ve yoˬ. Aˍbaˆsaˍlonˍ Iˉsaˍreˍlaˆ chaw dawˇ cawˇ tuˬ hkʼe awˬ hkʼaˇ ca leh te ve yoˬ. Awˉ lawˉ htaˇ Daˍviˆ Iˆtehˇ htaꞈ kʼoˆ piˇ ve, yawˇ buiˇ shaˆ aˉ naˆ chaw hpehꞈ ve pa taw, Daˍviˆ awˬ pon ga piˇ tuˬ maˇ loˍ tehꞈ dawˇ ve yoˬ. Yaꞈ hkʼaˇ, Iˆtehˇ kʼoˆ ve, “Jawˇ mawˇ˗oˬ, teꞈ htawˇ suh htawˇ ngaˬ nawˬ geh kʼai tuˬ yoˬ!”—2 Saˍmo˗eˍlaˆ 15:6, 18-21.
Iˆtehˇ Yaˬhoˉvaˬ leuˆ yuˬ taˍ ve jawˇ mawˇ Daˍviˆ htaꞈ ka tiꞈ yeˬ ve
Hkeˍraˍtiˆ chaw, Peˍlaˍtiˆ chaw, leh Gaˍtaˆ venˇ yaˇ buiˇ shaˆ aˉ naˆ chaw hpehꞈ ve htawˇ, Yaˬhoˉvaˬ lehˬ awˬ tehˬ awˬ na ve Gʼuiˬ sha hpehꞈ ve tehꞈ yawˇ hui shiˍ ve yoˬ. Leh Daˍviˆ Yaˬhoˉvaˬ leuˆ yuˬ piˇ taˍ ve jawˇ mawˇ hpehꞈ ve htaꞈ kaꞈ yawˇ hui shiˍ ve yoˬ. Daˍviˆ yawˇ hpawˇ chehˇ ve hawˉ hkʼaˆ chi teˇ hpaˍ ka tiꞈ yeˬ ve htaꞈ yawˇ awˬ bon uiˍ jaˇ leh awˬ hpfuhˇ shiˍ ve tehꞈ dawˇ ve yoˬ.
a Gʼuiˬ sha ve awˬ liˇ awˬ hkʼaˇ Bon maˍ ve liꞈ 23:3-6 hkʼaw bvuhꞈ taˍ ve htaꞈ kʼoˆ ve, Aˍmawˇniˆ chaw, Mawˇbaˆ chaw Yaˬhoˉvaˬ ve mvuhˇ miˬ yaˇ taˇ te tcuh. Nyi˗a kʼo awˬ liˇ awˬ hkʼaˇ chi ve teˇ tawn lehˬ, buiˇ shaˆ aˉ naˆ chaw htaꞈ tawˍ piˇ gʼa ve yoˬ. Yaꞈ hkʼaˇ, Iˉsaˍreˍlaˆ chaw yawˇ hui geh awˬ chawˇ te la tuˬ leh Yaˬhoˉvaˬ ve chaw chehˇ kuiˬ lo chehˇ la tuˬ yawˇ hui maˇ tawˍ piˇ. Liꞈ hpu hkʼaw na gʼa ve liꞈ kʼoˆ teˇ kʼoˆ liꞈ mehˆ hpfuhˇ 95 hkʼaw nyi sheˍ. (Laˇhuˍ hkawˇ maˇ cawˬ.)
