N’nga mutoidhiwa?
Mwasiwa ngwan’ni atu amaziza enango tali mugulu la anyakhondo a Mwene Davide?
ATU enango enao tali anyakhondo a Mwene Davide, ali Zeleki wa ziza la Amoni, Uriya wa ziza la Ahiti na Itima wa ziza la Amowabu. a (1 Li. 11:39, 41, 46) Mugulu laanyakondo a Mwene Davide mwatookala thitho “Akereti, Apereti na Agiti.” (2 Sa. 15:18) Vinooneya ira Akeleti na Apereti tali vaubalini na Afilisiti. (Zak. 25:16) Vinooneya thitho ira Agiti akumenle musidadi la Afilisiti wu Gati.—Yos. 13:2, 3; 1 Sa. 6:17, 18.
Mwasiwa ngwan’ni Davide atoorumela ira atu amaziza enango takale anyakhondwee? Davide kaakaikela ira atwala tali ororomeleya wa liye na wa Yohova. Mofwanafwani-a, voonga vya Akereti na Apereti, bukhu n’nango lothapulela madhu enango a Bibilyani laongile ira: “Aliwa tatookalave ororomeleya wa Davide masiki vahora yorucha maningi ya utongi wa Davide.” N’nga taodile a-vi irana vyevi? Mofwanafwani-a, “atu othene” tangam’iidhe Davide noroma a-rela mutu mwinango “ododomeya dhinalee Sheba,” Akereti na Apereti tatookalave ororomeleya wa Davide thitho tatom’kami-a Davide vokhoma khondo na gulu lodhimbinuelalo. (2 Sa. 20:1, 2, 7) Hora inango mwana Mwene Davide dhinalee Adoniya, anoofuna m’mwaki-a babee Umwene. Mbwenye Apereti na Akereti tatookalave ororomeleya wa Davide thitho tatoom’kami-a Solomo wenuo asakhuliwile na Nlungu ira akale mwene malo mwa babee.—1 Ma. 1:24-27, 38, 39.
Mutu mwinango wenuo ali ororomeleya maningi wa Davide ali Itai wau Gati. Itai na anyakhondwee 600 tatom’kami-a Davide vahora Abisalomu mwana Davide vyam’dhimbinuele liye babee noiri-a ira atu awu Israeli tam’dhimbinuele mwene. Voromavene Davide atom’mwandela Itai ira voi ali wa ziza n’nango, kaafwanela khoma khondwiyo. Mbwenye Itai atoom’mwakhula ira: “Ndinolumbela mudhina la Yohova Nlungu wa ingumi thitho wa nyo mwene muli vano, wu limburo nlilothene unadhowenyo, miyo namalabinyu ndinodha dhowa weo thitho ndili okhozeya wukwa ndingali vambo-i na nyo.”—2 Sa. 15:6, 18-21.
Itai ali ororomeleya wa Davide, thitho ali mwene ozoziwa na Yohova
Angalive ira Akeleti, Apereti na Agiti tali amaziza enango, Aliwa tatooidhiwa ira Yohova ngu Nlungu wa imbarimbari thitho ira Davide ali ozoziwa wa Yohova. Vinooneya ira Davide anoosimba maningi namwasa okami-iwa naatu ororomeleya ninga enala.
a Va lemba la Dotornomio 23:3-6, lamulo la Nlungu laonga ira a Amoni na Amowabu kativolowe muziza la Aisraeli. Mbwenye vinooneya ira lamuloli lanookondi-a ira atu amaziza enala katirumeli-iwenga mwailamulo aliwa kala Aisraeli, mbwenye lamuloli kalaakondi-a irana vyongo vambo-i na Aisraeli venango kala vambo-i na Aisraeli. Muone bukhu la Estudo Perspicaz das Escrituras Volume 1 thakuru 95.
