Udi mumanye anyi?
Bua tshinyi mu tshiluilu tshia mukalenge Davidi muvua balume bavua kabayi bena Isalele?
MU BALUME ba bukole ba mu bisamba bikuabu bavua mu tshiluilu tshia Davidi muvua Seleke muena Amona, Uliya muena Hiti, ne Yitema muena Moaba. a (1 Kul. 11:39, 41, 46) Muvua kabidi ‘bena Kelete, bena Pelete, ne bena Gata.’ (2 Sam. 15:18) Bidi bimueneka ne: bena Kelete ne bena Pelete bavua balela ba bena Peleshete. (Yeh. 25:16) Bena Gata bobu bavua ba mu tshimenga tshia Gata tshia mu Peleshete.—Yosh. 13:2, 3; 1 Sam. 6:17, 18.
Bua tshinyi Davidi uvua muanyishe bua balume abu babuele mu tshiluilu tshiende? Uvua mutuishibue ne: bavua ne lulamatu kudiye; tshia mushinga tshidi ne: bavua ne lulamatu kudi Yehowa. Tshilejilu, mukanda mukuabu udi wamba bua bena Kelete ne bena Pelete ne: “Bavua bashale ne lulamatu kudi Davidi mu bikondo bia ntatu mikole bia mu bukokeshi buende.” (The New Interpreter’s Dictionary of the Bible) Mmunyi muvuabu bashale ne lulamatu kudi Davidi? Pavua “bantu bonso ba mu Isalele” balekele mukalenge Davidi balonde “mukebeshi wa bimvundu mukuabu dîna diende Sheba,” bena Kelete ne bena Pelete bakashala ne Davidi ne kumuambuluishabu bua kujikija buntomboji buvua Sheba mujuule. (2 Sam. 20:1, 2, 7) Musangu mukuabu, Adoniya muana wa mukalenge Davidi wakajinga kulua mukalenge pa muaba wa Solomo. Musangu au kabidi, bena Kelete ne bena Pelete bakashala ne lulamatu kudi Davidi ne kuenzabu bua bateke Solomo mukalenge, bualu yeye ke uvua Yehowa musungule, bua apingane pa muaba wa Davidi.—1 Bak. 1:24-27, 38, 39.
Muntu wa bisamba bikuabu uvua mushale ne lulamatu kudi Davidi ng’Itai. Itai ne basalayi bende 600 bakatua Davidi mpanda pavua muanende Abashaloma mumutombokele ne musake bena Isalele bua babenge Davidi, bamuteke yeye mukalenge. Davidi wakanji kuambila Itai ne: bu muvuaye muntu wa bisamba bikuabu, kavua mua kumuluila mvita ayi to. Kadi Itai wakamuambila ne: “Bushuwa anu bu mudi Yehowa ne muoyo ne bushuwa anu bu mudi mfumu mukalenge wanyi ne muoyo, muaba wonso wikala mfumu mukalenge wanyi, nansha bua lufu nansha bua muoyo, muaba au ke wikala muena mudimu webe!”—2 Sam. 15:6, 18-21.
Itai uvua ne lulamatu kudi Davidi, mukalenge uvua Yehowa muele manyi
Nansha muvua bena Kelete ne bena Pelete ne bena Gata bikale bantu ba bisamba bikuabu, bavua banemeka Yehowa bikole bualu nNzambi mulelela, banemeka kabidi Davidi uvuaye muele manyi. Davidi uvua ne bua kuikala ne dianyisha dia bungi bua muvua bantu abu ne lulamatu kudiye!
a Mukenji wa Nzambi udi mu Dutelonome 23:3-6 uvua ukandika bena Amona ne bena Moaba bua kubuela mu tshisumbu tshia bena Isalele. Bidi bimueneka ne: mukenji au uvua wakula bua kubenga kulua muena Isalele, kadi kawuvua ukandika bena mu bisamba abi bua kudisangisha ne bantu ba Nzambi anyi kusomba nabu to. Tangila Étude Perspicace, Volime 1, dib. 100.
