Uno Mwatachikiza Tahi?
Mwomwo ika vatu vakumafuchi eka vapwililile maswalale jaMwangana Ndavichi?
HALI vaka-mafuchi vaze vapwile maswalale jaNdavichi hapwile naZeleke kaAmone, naUliya kaHete, naIchima kaMowave. a (Miji. 1, 11:39, 41, 46) Maswalale jaNdavichi vamwe nawa vapwile ‘vaKelete, navaPelete, navaNgata.’ (Samwe. 2, 15:18) Chasoloka nge vaKelete, navaPelete vapwile vausoko javaFwilishite. (Ezeke. 25:16) Kaha nawa vaNgata vafuminyine kuNgata nganda yavaFwilishite.—Yoshu. 13:2, 3; Samwe. 1, 6:17, 18.
Mwomwo ika Ndavichi engishile vaka-mafuchi eka mulizavu lyenyi lyamaswalale? Mwomwo afwelele ngwenyi vapwile vakushishika kuli ikiye, kaha chachilemunyi vapwile vakushishika kuli Yehova. Chakutalilaho, mukanda waThe New Interpreter’s Dictionary of the Bible wahanjika kutalilsa kuli vaKelete, navaPelete ngwawo: “Vatwalilileho kupwa vakushishika kuli Ndavichi namulwola lwalukalu chikuma muchiyulo chenyi.” Mujila muka? Omu “malunga vavaIsalele vosena” valitwaminyine kukavangiza Mwangana Ndavichi, nakukavangiza ‘kakulanganyi umwe, walijina lyaSheva,’ vaKelete navaPelete vatwalilileho lika kupwa vakushishika kuli Ndavichi nakumukafwa kufungulula Sheva mutu wakulikanga. (Samwe. 2, 20:1, 2, 7) Halwola lukwavo nawa, omu mwanaMwangana Ndavichi Atonyiya asakile kulihaka hawangana, vaKelete navaPelete vatwalilileho lika kupwa vakushishika kuli Ndavichi nakumukafwa kuswanyisa Solomone, mutu uze vasakwile kuli Yehova mangana akashise mwangana Ndavichi.—Vamya. 1, 1:24-27, 38, 39.
Mutu wakulifuchi lyeka nawa uze atwalilileho kupwa wakushishika kuli Ndavichi shina, Itai wakuNgata. Omu Avasalome mwanaNdavichi akunywile michima yamalunga vavaIsalele valikange kuli Mwangana Ndavichi, Itai namaswalale jenyi 600 vakundwijile Ndavichi. Hakavanga Ndavichi alwezele Itai ngwenyi, hakuwana nge kapwile kaIsaleleko, ngocho katelele kulwa jita kanako. Oloze Itai ambile ngwenyi: “Omu ayoya Yehova tu, nomu wayoya ove mwata wami mwangana tu, kweshokwo nauya ove mwata wami mwangana kukiko nanguya nayami ngamba yove, kaha nawa ngunalizange kufwila hamwe nayove.”—Samwe. 2, 15:6, 18-21.
Itai apwile wakushishika kuli Ndavichi uze apwile mwangana vawavishile kuli Yehova
Numba tuhu vaKelete navaPelete navaNgata vapwile vakumafuchi eka, oloze vatachikijile ngwavo Yehova ikiye Kalunga wamuchano, kaha nawa Ndavichi hiMwangana uze vawavishile kuli Yehova. Chikupu vene Ndavichi asakwililile Yehova hakupwa navava malunga vakushishika vaze vapwile kusali yenyi.
a Jishimbi jaKalunga jize vasoneka hali Lushimbi lwamuchivali 23:3-6, lwakanyishile vaAmone navaMowave kwingila muchikungulwilo chavaIsalele. Chipwe ngocho lushimbi kana lwatalikishile kuvatu vaze vasakilenga kupwa vatu jaKalunga muIsalele, keshi kuli vaka-mafuchi vaze vafwililile kulikata navatu jaYehova nakutwama nawo hamweko. Talenu mukanda wakwamba ngwawo Insight on the Scriptures, Volume 1, li. 95.
