Komana Mweluka?
Muloñadi añiinza chayitejeleliwu kwikala amashidika munjita yaMwanta Davidi?
HAKACHI kawañiinza amashidika adiña munjita yaDavidi hadiña Zeleki mwini Amoni, Uriya mwini Hiti niItama wakuMowabi. a (1 Kushi. 11:39, 41, 46) Hakachi kamashidika aDavidi hadiña ‘niaKereti, aPeleti niaGati.’ (2 Sam. 15:18) Chinamwekani neyi aKereti niaPeleti adiña antaña chikupu nawaFilisitinu. (Ezek. 25:16) AGati hadaha adiña enimbu amumusumba wamuFilisitinu waGati.—Yosh. 13:2, 3; 1 Sam. 6:17, 18.
Muloñadi Davidi chetejeleliyi añiinza kwikala munjita yindi? Wayikuhweleleli nindi adiña ashinshika kudi yena, sweje-e dinu kudi Yehova. Chakutalilahu, kutalisha hadi aKereti niaPeleti, dikishonali yimu yalumbulula hansañu yamuBayibolu yahosha nawu: “Atwalekelihu kwikala ashinshika kudi Davidi hamweneñayi kukala kweneni hampinji yayuulileñayi.” Elili ñahi mwenimu? Chelili “amayala ejima amuIsarela” aleki kumulondela Mwanta Davidi nakutachika kulondela “iyala wumu waleteleña kukala wejina daSheba,” aKereti niaPeleti atwalekelihu kwikala ashinshika kudi Davidi nawa amukwashili kukañesha kudikaña kwaSheba. (2 Sam. 20:1, 2, 7) Mpinji yimu, Adoniya mwana kaMwanta Davidi wakeñeleña kuhukula itanda dawanta. Hela chochu, aKereti niaPeleti atwalekelihu kwikala ashinshika kudi Davidi nawa amukwashili kuhitila mukuswanyika Solomoni hawanta, muloña diyi atondeliwu kudi Yehova nawu diyi mwanta wakalondelahu.—1 Anya. 1:24-27, 38, 39.
Ñiinza mukwawu wahamukili nakutwalekahu kwikala washinshika kudi Davidi wadiña Itayi wakuGati. Itayi niamashidika indi 600 amukwashili Mwanta Davidi hampinji yadikañili Abisalomi nawa habalumwiniyi nyichima yawantu amuIsarela kulonda adikañi namwanta. Hakusambila Davidi wamulejeli Itayi nindi chineli wadiña ñiinza, hateleleli kumuzuñilaku Davidiku. Ilaña Itayi wahosheli nindi: “Kwesekeja nachahandayi Yehova nichiwahanda eyi nkaaka yami mwanta, kwejima kuwakekala eyi nkaaka yami mwanta, hela mukufwa hela mukuhanda, dikunakekala ninami kambuñeyi!”—2 Sam. 15:6, 18-21.
Itayi wadiña washinshika kudi Davidi, mwanta awayishiliwu kudi Yehova
Hela chakwila aKereti, aPeleti niaGati adiña añiinza, elukili nawu Yehova diyi Nzambi walala nawa Davidi himuntu awayishawu kudi Yehova. Davidi watela wasakilili chikupu hakwikala nawamayala amuchidiwu ashinshika amukwashileña!
a Lushimbi lwaNzambi lwashimunawu haKuhituluka 23:3-6 lwayikaanishili eni Amoni nieni Mowabi kwiñila muchipompelu chawaIsarela. Hela chochu, chinamwekani neyi ilu lushimbi lwahosheleña hakwikala nalusesa chikupu lwakwikala mwenimbu mumuza nawa hilwayikaanishili añiinza kudikunda hela kushakama hamu nawantu jaNzambiku. Talenu Insight on the Scriptures, Volumu 1, ifu 95.
