Uzye mwamanyapo uli?
Umulandu Cii Uno Aonsi Atali Aina Izlaeli Yaelanga Asilika Umu Manda ya Mwene Devedi?
Apa yasilika atali aina izlaeli umu manda ya mwene Devedi pali Zeleki umwina Amoni, Uliya umwina Hiti, alino na Itima umwina Moabu. a (1 Mila. 11:39, 41, 46) Umu yasilika yano Devedi wakweti mwali na ina ‘Keleti, Peleti, Gati.’ (2 Sam. 15:18) Aina Keleti,na ina Peleti yafumile umu aina Filisti. (Ezek. 25:16) Aina Gati yafumile umu Gati umuzi uwayelile umu aina Filisti.— Yoswa 13:2, 3; 1 Sam. 6:17, 18.
Umulandu cii uno Devedi wazumilizizye antu yaa ukuya asilika? Waweni vino yali acisinka kuli aliwe alino na vino yacindime sana kuli Yeova. Wakwe, ibuku limwi (The New Interpreter’s Dictionary of the Bible) lyalanzile pa ina Keleti na ina Peleti ukuti: “yatwalilile ukuya acisinka kuli Devedi na lino ivintu vya vyatazile.” Uzye yalangilile uli ukuti yali ni cisinka? Lino “Aina Izlaeli yonsi” yatiile ukulondela Devedi nu kutandika ukulondela “kaleta wa vimvulunganya uwi zina lyakuti Syeba,” ina Keleti na ina Peleti yatwalilile ukuya acisinka kuli Devedi nu kumwazwa ukumala ivimvulunganya vino Syeba walesile. (2 Sam. 20:1, 2, 7) Nupya pa nsita imwi Adoniya mwana Devedi walondanga ukupoka uwene kuli isi. Lelo, ina Keleti na ina Peleti yatwalilile ukuya acisinka kuli Devedi nupya yamwazile ukwika Solomoni pa wene, wino Yeova wasoolwile ukuya umwene.—1 Yamw. 1:24-27, 38, 39.
Umuntu na muze uwatwalilile ukuya uwa cisinka kuli Devedi a Itai umwina Gati. Itai alino na asilika yakwe 600 yatungilile umwene Devedi lino umwana wakwe Abusalomu wamusangukile nu kulenga Aina Izlaeli ukusangukila umwene. Devedi wanenyile Itai ukuti pa mulandu wakuti atali umwina izlaeli atalinzile ukulwa. Nomba Itai walanzile ukuti: “Nkulapa pali Yeova Leza wa umi na pa umi wako we musambazi wane, konsi kuno ulaya akuno nani ne muomvi wako ndaya, injipekanya sile nu kufwila pamwi naawe.”—2 Sam. 15:6, 18-21.
Itai wali uwa cisinka kuli Devedi Umwene uno Yeova wasoolwile
Nanti icakuti Aina Keleti, Aina Peleti, alino na Aina Gati yatali Aina Izlaeli, yamanyile ukuti Yeova wali a Leza wa cumi nupya uwasoolwile Devedi ukuya umwene. Ukwaula nu kutwisika Devedi wataizye sana pali vino aonsi yaa yatwalilile ukuya acisinka kuli aliwe.
a Isunde lyakwe Leza ilikazanwa pali Malango 23:3-6 litazumilizyanga Aina Amoni na Ina Moabu ukuya pamwi na Ina Izlaeli. Nomba cikaloleka kwati isunde lii lyakanyanga antu yaa ukwikala pamwi lelo litakanyanga antu yaa ukuvwana. Lolini muli Insight on the Scriptures, Volume 1, ifwa. 95 umu cizungu.
