ДАВИДЫН войскаже еврей-влак гыч веле огыл шоген. Мутлан, сарзыже-влак коклаште аммонит калык гыч Целек, хеттей Урия да моавит калык гыч Итма лийыныт (1 Лет. 11:39, 41, 46) a. Тыгак Давидлан керетей, пелетей ден гатян-влак служитленыт (2 Сам. 15:18). Керетей ден пелетей-влак, очыни, филистим-влакын лишыл родышт лийыныт (Иез. 25:16). А гатян-влак — тиде филистим Гат олаште илыше-влак (Иис. Н. 13:2, 3; 1 Сам. 6:17, 18).

Молан Давид армийышкыже вес калык гыч еҥ-влакым налын? Тудо пален: нуно тудлан, а эн тӱҥжӧ, Иеговалан ӱшанле лийыныт. Мутлан, теве мом ик библий справочникыште керетей ден пелетей-влак нерген ойлалтеш: «Нуно Давидын вуйлатымыж годым эн йӧсӧ жапыштат тудлан ӱшанле кодыныт» (The New Interpreter’s Dictionary of the Bible). Кузе нуно ӱшанле улмыштым ончыктеныт? Кунам израильтян-влак чыланат Давидым коденыт да Шева лӱман айдеме почеш каеныт, керетей ден пелетей-влак кугыжа дене кодыныт да тудлан пудыранчыкым пытараш полшеныт (2 Сам. 20:1, 2, 7). Вараракшым Адония, Давидын эргыже, Соломон олмеш кугыжа лияш тӧчен. Но керетей ден пелетей-влак Давидлан ӱшанле кодыныт да Соломонлан, кудыжым Иегова Давид олмеш кугыжалан шогалтен, кугыжа лияш полшеныт (1 Цар. 1:24—27, 38, 39).

Эше ик йот еҥ, кудыжо Давидлан тӱрыснек ӱшанле кодын, гатян калык гыч Иттай лийын. Тудо да 600 сарзыже кугыжан могырыштыжо лийыныт, кунам Авессалом пуламырым тарватен да шке почешыже шуко израильтяным наҥгаен. Иттай йот еҥ семын кугыжа верч кредалаш обязанный лийын огыл. Давид тудлан тидын нергенак каласен. Но Иттай вашештен: «Иегова дене, илыше Юмо дене, да кугыжамын илышыж дене товатлем! Кушто тый лият, тушто тарзет лиеш, мый тый денет колашат ямде улам!» (2 Сам. 15:6, 18—21).

Керетей, пелетей ден гатян-влак израильтян лийын огытыл гынат, Иеговам чын Юмым семын пагаленыт, а Давидым — тудын шӱрымӧ кугыжам семын. Давид воктенже тыгай ӱшанле еҥ-влакын лиймыштым чот аклен да тидлан таум ыштен!