Wahinona?
Mwahaya bwaddi anyakoddo amodha a mwene Davidi kiyaali amwaana Izarayeli?
DAVIDI ahikanna anyakoddo yahaali amwaana Izarayeli. Motajhiha, Zeleki mu Amonita, Uriya mu Itita ni Itima mMowabita. a (1 Cró. 11:39, 41, 46) Anyakoddo amodhaya a Davidi yahaali amwaana Ezarayeli, yaali: ‘Makeritita, Mapeletita ni Majetewu.’ (2 Sam. 15:18) Makeritita ni Mapeletita podi wera yaali odhuulu wa mafilistewu. (Eze. 25:16) Majetewu yaadhele luwani ya mafilistewu yithaniwa Gati. — Jos. 13:2, 3; 1 Sam. 6:17, 18.
Mbwenye mwahaya bwaddi Davidi adhe eenyege wi alobwana ala ekale anyakoddo aye? Oliye ahikanna ebaribari wihina aliwa yaali oororomeleya wa oliye ni oororomeleya wa Yehova. Motajhiha, Disiyonariyu muxa anatapulela madhu a mBibiliyani ni Engeleji anowoga ethu wodhela Makeritita ni Mapeletita, anawoga egi: “Aliwa yahididela okala oororomeleya wa Davidi mudhidhi worusa wa onamathonga waye.” Aliwa yoonihile aavi okala oororomeleya? Mudhidhi ‘alobwana aatene owIzarayeli’ nuuhiya omuhara Davidi wihina emuharege ‘mulobwana dhaala oothabwa otamaliwa ithaniwa Seba,’ Makeritita ni Mapeletita, yahididela okala epaddi ya Davidi ni yahimukavihera omariha makathamiho aatatamunle Seba mwaha wa ovuruvuru waye. (2 Sam. 20:1, 2, 7) Vasogolova, mwaana a Davidi Adoniya, nuuxixa okala mwene vamburoni va Salomawu Makeritita vamodha ni Mapeletita yahididela okala oororomeleya wa Davidi, wodhela omukavihera Salomawu okala mwene mwaha eyo yaali efunelo ya Yehova. — 1 Reis. 1:24-27, 38, 39.
Muthu mmodha aali oororomeleya wa Davidi mbwenye ahaali mwaana Ezarayeli, aali Itayi, Mujetewu. Itayi vamodha ni alobwana owakwana 600 yahimukavihera Davidi, mudhidhi mwanaye Abisalawu numurugunuwela ni nuuxixa wathukulela amwaana Izarayeli werana emodhave. Omambelelowene Davidi omwaddela Itayi wi kaahowela omukavihera mukoddoni mune, woona wihina oliye kaali mwana Izarayeli. Mbwenye Itayi omwakula Davidi egi: ‘Oofwanelela okalawo di Yehova ni oofwanelela okalawo di nyu mwene, kaginapwatha munafuninyu okala mudhaari enyu anakale vamodha ni nyu, naarive ehoweleyaga okwa obe naari!’ — 2 Sam. 15:6, 18-21.
Itayi aali oororomeleya ni Davidi, muthikitheliwi a Yehova
Naarive Makeritita, Mapeletita ni Itayi yahili amwaana Ezarayeli, aliwa yahikanna ebaribari wi Yehova Mulugu eebaribari, ni wihina Davidi aali muthikitheliwi a Yehova. Mohanganyedha Davidi ootamalela vanlubale mwaha okanna athu oororomeleya ninga yala epaddi yaye!
a Mowiwanana ni Nlamulo Yehova aavahiliye amwaana Izarayeli nnafwanyeya va Deuteronómio 23:3-6 Maamonita ni Mamowabita yokooddihiwa okala epaddi ya amwaana Ezarayeli. Mbwenye enakala ninga Nlamulo nna naakoddiha baahi athu a malogo ala ononiwa ninga amwaana Izarayeli. Mbwenye nlamulo nna noowenya athu a malogo ala okala vamodha ni amwaana Ezarayeli. Osayele musolo onihina Amonitas mu Estudo Perspicaz das Escrituras Volume 1 epaddi 114
