BU-ZẼMS neb n da naag a Davɩɩd tãb-biisã. Wala makre, Amon ned a Zelɛke, Hɛt rao a Uuri la Mowaab rao a Itma. a (1 Kib 11:39, 41, 46) “Kerɛt neba, Pelɛt neb la Gat neb” me n da be a Davɩɩd tãb-biisã sʋka. (2 Sãm. 15:18) Wõnda Kerɛt nebã ne Pelɛt nebã ra kĩi ne Filisti nebã. (Eze. 25:16) Gat nebã yaa Filisti tẽng ning b sẽn da boond tɩ Gatã neba.—Zoz. 13:2, 3; 1 Sãm. 6:17, 18.

Bõe yĩng t’a Davɩɩd sak tɩ bu-zẽms neb naag a tãb-biisã? A ra kɩsa sɩd tɩ b na n maana sɩd ne-a, la sẽn yɩɩd fãa tɩ b na n maana sɩd ne a Zeova. Wala makre, sebr a yembr goma Kerɛt la Pelɛt nebã yell n yeel yaa: “B kell n maana sɩd ne a Davɩɩde, sẽn yɩɩd fãa a sẽn wa n tar zu-loees a naamã wakatã.” Bõe la b maan-yã? “Israyɛll rapã fãa” sẽn wa n bas rĩm a Davɩɩd n pʋg “rao a ye sẽn da yaa tẽn-dãmbd t’a yʋʋr boondẽ t’a Saba” wã, Kerɛt nebã ne Pelɛt nebã kell n maana sɩd ne a Davɩɩde, n sõng-a n zab ne a Saba la a poorẽ dãmbã n tõoge. (2 Sãm. 20:1, 2, 7) Wakat n zĩnd me tɩ rĩm a Davɩɩd biig a Adoniza bao n na n deeg naamã. La Kerɛt nebã ne Pelɛt nebã kell n maana sɩd ne a Davɩɩde, n sõng a Salomo sẽn yaa ned ning a Zeova sẽn da yãk t’a na n ledg rĩmã t’a lebg naaba.—1 Rĩm. 1:24-27, 38, 39.

Bu-zẽng ned a to me sẽn maan sɩd ne a Davɩɩd ne a sũur fãa yɩɩ Gat rao a Itayi. A Itayi ne a gãndaad kobs-yoobã kell n teela rĩm a Davɩɩde, wakat ning a Davɩɩd biig a Absalom sẽn lebg tõata, n belg Israyɛll nebã tɩ b yi a Davɩɩd poorẽ wã. Sɩngrẽ wã a Davɩɩd yeela a Itayi t’a sẽn yaa bu-zẽngã yĩnga, pa tɩlɛ t’a sõng yẽ n zab ye. La a Itayi yeelame yaa: “Mam wẽenda ne a Zeova sẽn vɩ wã, la m wẽenda ne yãmb sẽn vɩ wã, tɩ zĩig ning fãa yãmb sẽn na n kẽnge, baa na n tũ ne m yõore, mam na n kẽngame.”—2 Sãm. 15:6, 18-21.

Baa Kerɛt nebã, Pelɛt nebã la Gat nebã sẽn da yaa bu-zẽmsã, b sak n deegame t’a Zeova la Wẽnnaam sɩd-sɩdã, la t’a Davɩɩd n yaa soab ning a Zeova sẽn yãkã. Yaa vẽeneg t’a Davɩɩd sẽn da paam tɩ neb a woto be ne-a wã, a sũur da noomame.