SU̱VÍ na̱ ñuu Israel níxi̱yo ndiʼiví na̱ soldado na̱ xi̱kuumií ta̱ David. Tá kúú, ta̱ Zélec ta̱ ammonita, ta̱ Urías ta̱ xi̱kuu ta̱ hitita xíʼin ta̱ Itmá ta̱ moabita (1 Crón. 11:​39, 41, 46). a Saátu ni̱xi̱yo na̱ keretita na̱ peletita xíʼin na̱ guitita (2 Sam. 15:18). Sana táʼan na̱ filisteo xi̱kuu na̱ keretita xíʼin na̱ peletita (Ezeq. 25:16). Ta na̱ guitita xi̱ndoona ñuu Gat, ta ñuu na̱ filisteo xi̱kuutu ña̱yóʼova (Jos. 13:​2, 3; 1 Sam. 6:​17, 18).

¿Nda̱chun ta̱xi ta̱ David ña̱ chindeétáʼan na̱ inka ñuu xíʼinra ña̱ kanitáʼanra? Saáchi xi̱kandíxara ña̱ nda̱kúní koo ini na̱yóʼo xíʼin Jehová ta saátu va̱ʼaní chindeétáʼanna xíʼinra. Tá kúú, ná ka̱ʼa̱nyó xa̱ʼa̱ ña̱ ke̱ʼé na̱ keretita xíʼin na̱ peletita, ña̱ The New Interpreter’s Dictionary of the Bible káchiña: “Na̱yóʼo, nda̱kúní ni̱xi̱yo inina xíʼin ta̱ David ta va̱ʼaní chi̱ndeétáʼanna xíʼinra ni ni̱ya̱ʼana nu̱ú ku̱a̱ʼání tu̱ndóʼo”. ¿Nda̱chun va̱ʼa kúndaa̱-iniyó ña̱yóʼo? Saáchi, tá sa̱ndákoo ndiʼi na̱ ta̱a na̱ ñuu Israel ta̱ David ta nda̱kiʼinna ku̱a̱ʼa̱nna chindeétáʼanna xíʼin iin ta̱a ta̱ ku̱a̱chiní-ini ta̱ xi̱naní Seba, na̱ keretita xíʼin na̱ peletita chi̱ndeétáʼanna xíʼin ta̱ David ña̱ va̱ʼa ndani̱ʼína ta̱ Seba ta kaʼnínara (2 Sam. 20:​1, 2, 7). Iin yichi̱, iin se̱ʼe ta̱ rey David ta xi̱naní Adonías xi̱kuni̱ra koora rey, soo na̱ keretita xíʼin na̱ peletita nda̱kúní ni̱xi̱yo inina xíʼin ta̱ rey David ta chi̱ndeétáʼanna xíʼin ta̱ Salomón ña̱ xa̱a̱ra koora rey, saáchi xi̱kunda̱a̱-inina ña̱ mií Jehová nda̱kaxi̱nra ña̱ koora rey (1 Rey. 1:​24-27, 38, 39).

Inka ta̱ nda̱kúní ni̱xi̱yo ini xíʼin ta̱ rey David xi̱kuu ta̱ Ittái ta̱ guitita. Ta̱ Ittái xíʼin na̱ 600 ta̱a na̱ xi̱kitáʼan xíʼinra chi̱ndeétáʼanna xíʼin ta̱ David tá xi̱kuni̱ se̱ʼera ta̱ Absalón koora rey nu̱ú na̱ ñuu Israel. Ta̱ David ni̱ka̱ʼa̱nra xíʼin ta̱ Ittái ña̱ kǒo xíniñúʼu chindeétáʼanvíra xíʼinra chi ta̱ inka ñuu kúúra, soo ta̱ Ittái ni̱ka̱ʼa̱nra ña̱yóʼo xíʼin ta̱ David: “Chínaʼíi̱ xa̱ʼa̱ Jehová, Ndióxi̱ ta̱ táku ta saátu chínaʼíi̱ xa̱ʼa̱ miíún táta rey, nda̱a̱ ndáaka nu̱ú ná ku̱ʼún táta rey kán ku̱ʼi̱n xíʼún ta nda̱a̱ íyo tu̱ʼvai̱ ña̱ kuvii̱ xa̱ʼún” (2 Sam. 15:​6, 18-21).

Na̱ keretita, na̱ peletita xíʼin na̱ guitita na̱ inka ñuu ni̱xi̱yona, soo xi̱kandíxanína ña̱ xi̱kuu Jehová Ndióxi̱ ta̱ nda̱a̱ ta xi̱ ixato̱ʼónína ta̱ rey David saáchi mií Ndióxi̱ nda̱kaxinra ña̱ kaʼndachíñura. Ña̱yóʼo sa̱kúsi̱íníña-ini ta̱ rey David saáchi nda̱kúní ni̱xi̱yo inina xíʼinra.