Mua vi Tantekeyele Ni?
Omo lia vika vamo vamala ka va puile vaIsaleli navo va puile masualale va Ndaviti?
ZELEKE kaAmone, Uliya kaHiteu na Itema kaMoave va puile masualale vaNdaviti vutuhu ka va puile vaIsaleli. a (1 Miz. 11:39, 41, 46) Masualale vaNdaviti va puile naua “vaKelete vose, na vaPelete vose na vaNgate vose.” (2 Sam. 15:18) Ci soloka ngue vaKelete na vaPelete va likatele cikuma na vaFilisteo. (Ezek. 25:16) Kaha vaNgate va yoyelele ku Ngate, mbonge ya vaFilisteo.—Yeho. 13:2, 3; 1 Sam. 6:17, 18.
Omo lia vika Ndaviti ua tavesele vamala vaco ku pua masualale vendi? Muomu ua kele na vusunga nguendi va puile vakua vuoloke kuli ikeye, kaha cikumakuma kuli Yehova. Ca ku muenako, imo Dicionário ya Mbimbiliya nguayo: “Mu ntsimbu ya ikalu mua kele na ku sika Ndaviti, va tualeleleho ku kakatela ku ikeye.” Vati va lingilemo? Omo “vamala vose va Isaleli” va sile Ndaviti na ku kava “muntu ua ngoco, lizina lieni Seva,” vaKelete na vaPelete va tualeleho ku kakatela kuli Muangana Ndaviti na ku mu kuasa mu visoti via kokele Seva. (2 Sam. 20:1, 2, 7) Cikuavo naua, Andoniya muana Muangana Ndaviti, ua tondele kupua muangana mu cihela ca Solomone. Vunoni vaKelete na vaPelete va tualeleleho ku kala ku mutamba ua Ndaviti na ku mu kuasa ku puisa Solomone muangana.—1 Vam. 1:24-27, 38, 39.
Muntu mukuavo ua tualeleho ku kakatela kuli Ndaviti ua puile Itayi kaNgate. Omo Avisalome ualulukilile Ise na ku seteka ku lingisa vamala va Isaleli va mu puise muangana mu cihela ca Ndaviti, Itayi na masualale vendi va ku pua 600, va kuasele Muangana Ndaviti. Kaha Ndaviti ua lekele Itayi nguendi, mu ku linga ka puile kaIsaleli, ka tondekele ku mu kuasa. Vunoni Itayi ua mu kumbuluile nguendi: “Mua yoya Yehova, na mua yoya kukuange muangana, mua vusunga ku muhela uze ku a ka kala kukuange muangana, cipue ku ku-tsa cipue ku muono, kuze vene ku a ku zanga ku kala ngamba yove.”—2 Sam. 15:6, 18-21.
Itayi ua kele ku mutamba ua Ndaviti, muangana ya vuavesele Yehova
Vutuhu vaKelete, vaPelete, na vaNgate ka va puile vaIsaleli, vunoni va singimikile cikuma Yehova mu ku pua Njambi ua vusunga. Kaha va singimikile naua Ndaviti mu kupua muangana ya vuavesele Yehova. Mua vusunga, Ndaviti ua vuahelele omo lia ku kala na vamala vaco ku mutamba uendi.
a Lisiko lia Njambi lia ku Ndeutelonomi 23:3-6, lia vindikile vaAmone na vaMoave ku kovela ha kati ka vaIsaleli. Vunoni, ci soloka ngue lisiko liaco liemanenene vaze va tondele ku pua mpundu vakua cifuti ca Isaleli mu vutuntu. Kaha ka lia vindikile vangendzi ku likata na vangamba va Njambi ni ku yoyela ha kati kavo. Talenu Estudo Perspicaz das Escrituras, Volume 1 lifo 114.
