Owe shi tseya ngaa?
Omolwashike metangakwiita lyomukwaniilwa David mwa li mu na aakwiilongo?
YAMWE yomaakwiita aakwiilongo mboka ya li metangakwiita lyaDavid ongaashi Zelek, Omuammoni, Uria, Omuheti nosho wo Itma, Omumoabi. a (1 Ondjal. 11:39, 41, 46) Metangakwiita lyaDavid omwa li wo ‘Aakreti nAapleti nosho wo Aagat.’ (2 Sam. 15:18, OB-1954) Osha fa shi li ngeyi kutya Aakreti nAapleti oya li ya pambathana nAafilisti. (Hes. 25:16) Aagat otashi vulika ya li aakalimo yomoshilando Gat shAafilisti. — Jos. 13:2, 3; 1 Sam. 6:17, 18.
Omolwashike David a li a pitike aakwiilongo ya kale metangakwiita lye? Omolwaashoka okwa li e na uushili kutya oye li aadhiginini kuye, naunene tuu kuJehova. Pashiholelwa, shi na ko nasha nAakreti nAapleti, embo lyedhina The New Interpreter’s Dictionary of the Bible olya ti: “Oya kala aadhiginini kuDavid moonkalo oondhigu noonkondo pethimbo ta pangele.” Uudhiginini oye wu ulike ngiini? Sho “Aaisraeli” ya li ya thigi po omukwaniilwa David e taya landula “omulumentu omupwidhi, Sheba,” Aakreti nAapleti oya kala aadhiginini kuDavid noye mu kwathele mokuhulitha po uunashipotha waSheba. (2 Sam. 20:1, 2, 7) Pompito yimwe, omwanamati gwomukwaniilwa David, Adonia, okwa li a kambadhala okwiininga omukwaniilwa pehala lyaSalomo, ngoka a hogololwa kuJehova oye a ninge omukwaniilwa ta landula ko. Ihe nando ongawo, Aakreti nAapleti oya li ya kala aadhiginini kuDavid noye mu kwathele okulangeka po Salomo. — 1 Aak. 1:24-27, 38, 39.
Omukwiilongo gulwe ngoka a li a kala omudhiginini noonkondo kuDavid okwa li Ittai, Omugat. Ittai naalumentu ye oofule 600 oya li ya ambidhidha omukwaniilwa David, sho omwanamati gwaDavid, Absalom, a tukula uunashipotha e ta ningitha Aaisraeli ye mu ninge omukwaniilwa pehala lyaDavid. David okwa li a lombwele Ittai kutya molwaashoka ye omukwiilongo, ke na oku mu kondjela. Ihe Ittai okwa ti: “Nkeyama, otandi ku ganene medhina lyOmuwa kutya otandi yi nangoye shaa mpoka to yi, nando nee nashi pule eso.” — 2 Sam. 15:6, 18-21.
Ittai okwa li omudhiginini kuDavid, omukwaniilwa ngoka a langekwa po kuJehova
Nokuli nando Aakreti nAapleti nosho wo Aagat oya li aakwiilongo, oya li ya simaneka noonkondo Kalunga kashili Jehova naDavid, ngoka oye a langekwa po kuJehova. David ka li tuu a pandula sho aalumentu mboka aadhiginini ya gama kuye!
a Ompango yaKalunga ndjoka ya nyolwa muDeuteronomium 23:3-6, oya li ya indika Aayammoni nAamoabi ya kale megongalo lyaIsraeli. Ihe nando ongawo, osha fa shi li ngeyi kutya ompango ndjoka oya li ya popi shi na ko nasha nokuhangana paveta noshigwana shaIsraeli, ihe inayi indika aakwiilongo ya endathane nenge ya kale pamwe noshigwana shaKalunga. Tala embo Insight on the Scriptures, Volume 1, ep. 95.
