Apwanne Mwaanasuwela?
Ntakhara Heeni Anamarwa Yaarumeelaaya Ntoko Anakhoco a Mwene Tavite?
VARIYARI va anamarwa yaawo yaarumeela ntoko anakhoco a Tavite yaari alopwana ntoko Seleki o Amoni, Uriya o Hitita ni Itima o Mowape. a (1 Math. 11:39, 41, 46) Anakhoco a Tavite yaaphitaanyerya tho “Akereti, Apeleti ni Aketeti.” (2 Sam. 15:18) Akereti ni Apeleti woonaru yaarweenle wa Afilisti. (Ese. 25:16) Aketeti woonaru yaarweenle o Kati, yeeyo yaari epooma ya Afilisti.—Yos. 13:2, 3; 1 Sam. 6:17, 18.
Ntakhara heeni Tavite eemerenryeiye wi anamarwa yaala erumeeleke ntoko anakhoco awe? Owo aahikhalano nroromelo wi awo yaari oororomeleya wa yoowo, nave echu yoochuneyaxa, yaari oororomeleya wa Yehova. Ntoko yootakiherya, Tisiyonaariu Mmoha a Piipiliya ooloca ela wa Akereti ni Apeleti: “Awo yaahititelela okhala oororomeleya wa Tavite mmikhalelo soovilaxa variyari va olamulelo awe.” Mwawiihai? Vaavaa ‘achu oothene o Isarayeli yaamuhin’yaaya Tavite enamuchara mulopwana oonanara murima awiichaniwa Sepa,’ Akereti ni Apeleti yaahititelela okhala mmakupa a Tavite nave yaahimukhaviherya omaliha omwareya wa Sepa. (2 Sam. 20:1, 2, 7, PMM) Mu elukuluku ekina, Atoniya mwaana a Mwene Tavite aaheererya okhala mwene mu nipuro na Solomoni. Nyenya, Akereti ni Apeleti yaahititelela okhala oororomeleya wa Tavite nave yaahimukhaviherya Solomoni okhala mwene, woona wi ela yaari yoothanla ya Yehova.—1 Mam. 1:24-27, 38, 39.
Namarwa mukina yoowo aari oororomeleyaxa wa Tavite aari Itai, Muketeti. Itai vamoha ni anakhoco awe 600 yaahimukhaviherya Mwene Tavite vaavaa Apusalawu, mwaana a Tavite aamwareenleiye ni eererya wi achu a Isarayeli yeereno emohamoha. Wuupaceryani, Tavite aaloca wa Itai wi, woona wi owo aari namarwa, owo haaphwanela wiivoliiherya mu owana yoola. Nto Itai aahi: “Kinnalipela wa Apwiya ni wa amwene pwiyaka wi weiwo munayaanyuwo, naari okhwa, naari okumi, miyo namuteko anyu nnii nikhale vamoha.”—2 Sam. 15:6, 18-21, PMM.
Itai aari oororomeleya wa Tavite, mwene oothanliwa ni Yehova
Naamwi Akereti, Apeleti ni Aketeti yaari anamarwa, awo yaahisuwela wi Yehova tori Muluku eeparipari nave wi Tavite aari oothanliwa a Yehova. Mweeparipari, Mwene Tavite aanathamalela vancipale nthowa na okhalano alopwana yaala oororomeleyaxa mmakupa awe!
a Mwawiiwanana ni nlamulo na Muluku nnaphwanyeya mu Malamulo 23:3-6, Amooni ni Amowape yaanakhwatiiheryiwa ovolowa mmuloko wa Aisarayeli. Nyenya, enakhala wi nlamulo nenla naaloca pahiru wa mahimo yaala okhalano weemereryiwa mwa nlamulo ntoko anamurala a nloko na Aisarayeli. Moone makupa ani “Amonitas” mu Estudo Perspicaz das Escrituras.
