Kghani Bewazi?
Kubayini abantu abavela kezinye iinarha bebaba mabutho weKosi uDavida?
HLANGANA namadoda aziingorho avela kezinye iinarha asebuthweni lakaDavida, bekunamadoda anjengoTselekhi umAmoni, u-Uriya umRhiti noJitima umMowabi. a (1 Kron. 11:39, 41, 46) Ibutho lakaDavida belihlanganisa “amaKereti, amaPeleti namaGathi.” (2 Sam. 15:18) Kubonakala kwanga amaKereti namaPeleti bekahlobene namaFilista. (Hez. 25:16) AmaGathi bekavela eDorobheni leFilista okuthiwa yiGathi.—Jotj. 13:2, 3; 1 Sam. 6:17, 18.
Kubayini uDavida avumela amadoda afana nala bona abe sebuthweni lakhe? Kungombana bekaqiniseka bona bekathembekile kuye okuqakatheke ukudlula koke bekathembe kuJehova. Ngokwesibonelo, malungana namaKereti namaPeleti i- The New Interpreter’s Dictionary of the Bible ithi: “Ahlala athembekile hlangana nesikhathi esibudisi sokubusa kwakaDavida.” Kwenzeka njani lokho? Ngesikhathi “woke amadoda wakwa-Israyeli” alisa ukulandela iKosi uDavida, alandela ‘indoda ephehla inturhu ebekuthiwa nguTjheba’ amaKereti namaPeleti asekela uDavida begodu amsiza walwisana noTjheba, ohlubukako. (2 Sam. 20:1, 2, 7) Ngakelinye ihlangothi, indodana yeKosi uDavida u-Adoniya yalinga ukuthatha ubukhosi. Nanyana kunjalo, amaKereti namaPeleti ahlala athembekile kuDavida, amsiza ekubekeni uSolomoni bona abe yikosi elandelako ngombana bekakhethwe nguJehova.—1 Kho. 1:24-27, 38, 39.
Enye indoda eyaba nesibindi yathembeka kuDavida, bekungu-Itayi umGathi. U-Itayi neengorho zakhe ezima-600, basekela iKosi uDavida ngesikhathi indodanayo u-Absalomu ihlubuka begodu yenza iinhliziyo zamadoda wakwa-Israyeli zihlubuke ekosini. Ekuthomeni uDavida watjela u-Itayi ukuthi ngebanga lokuthi uvela kenye inarha, akutlhogeki alwe ipi le. Kodwana u-Itayi wathi: “Ngifunga ngoJehova uZimu ophilako begodu ngifunga ngekosami ephilako, nanyana kukuphi lapha ikosami ingaba khona, kungaba sekufeni namkha ekuphileni, kulapho nesisebenzi sakho sizokuba khona!”—2 Sam. 15:6, 18-21.
U-Itayi bekathembekile kuDavida, iKosi ezesiweko kaJehova
Ngitjho nanyana amaKereti, amaPeleti namaGathi bakavela kwezinye iinarha, bakazi bona uJehova nguZimu weqiniso nokuthi uDavida ngozesiweko kaJehova. Kufuze bona bekumthabisa uDavida ukuba namadoda athembekileko la!
a UmThetho otlolwe kuDuteronomi 23:3-6 bewuvimbela abantu bakwa-Amoni nebakwaMowabi bona bangangeni ebandleni lakaJehova. Nanyana kunjalo, kubonakala kwanga umthetho lo, bewuthi angeze baba malunga wesitjhaba kodwana bewungabakhandeli bona bahlale nabantu bakaZimu. Funda i-Insight on the Scriptures, Volume 1, k. 95.
