Kansi mwewo muziŵa?
Ndaŵa yanji m’gulu ya masodja a Mfumu Davide mwenze ŵanthu amitundu iyakine?
PAKATI pa ŵanthu amitundu iyakine amene enzetumikila Davide monga masodja ŵake, penze Zeleki mbadwa ya ya Amoni, Uriya Muhiti, komasoti Itima waku Mowabu. a (1 Mbiri 11:39, 41, 46) M’gulu ya masodja a Davide mwenzesoti ‘Akereti, Apeleti, komasoti Ahiti.’ (2 Sam. 15:18) Vuwoneka kuti Akereti na Apeleti enze ofumila muntundu wa Afilisiti. (Eze. 25:16) Ahiti enze ofumila m’tauni ya Afilisiti ku Gate.— Yos. 13:2, 3; 1 Sam. 6:17, 18.
Lomba ndaŵa yanji Davide evomela kuti analume amene aŵa ankhale m’gulu ya masodja ŵake? Yove enzeziŵa kuti analume amene aŵa enze okhulupilika kuli yove, ndipo chofunika ngako n’chakuti ove enze okhulupilika kwa Yehova. Mwachisanzo, ponena za Apeleti na Akereti The New Interpreter’s Dictionary of the Bible yunena kuti: “Ove epitilija kunkhala okhulupilika kuli Davide olo pa nthawe yovuta ngako mu ufumu wake.” Kansi ove ewonesha tyani kuti enze okhulupilika? ‘Analume onse a Isiraeli pechimusiya Davide noyamba kukonkhelela Sheba, Akereti na Apeleti epitilija kunkhala kumbali ya Davide komasoti emuyavya polimbana na Sheba wamene enze woukila.’ (2 Sam. 20:1, 2, 7) Pa nthawe iyakine, Adoniya mwana wa Mfumu Davide enzefuna kunkhala mfumu m’malo mwa Solomo. Koma Akereti na Apeleti epitilija kuwonesha kuti ni okhulupilika kuli Davide poyavya Solomo kuti ankhale mfumu, chifukwa niye wechisankha Yehova kuti azaloŵe mmalo mwa Davide.—1 Maf. 1:24–27, 38, 39.
Munalume wa ntundu uyakine wamene enze wokhulupilika ngako kuli Davide, enze Itai waku Gati. Itai pamozi na analume 600 ŵenze nawo, eyavya Davide penzeukiliwa na mwana wake Abisalomu ndipo yove enzefuna kuti nawosoti Aisiraeli achite chimozi-mozi. Poyamba, Davide euja Itai kuti enzefunikalini kuloŵelela pankhondo yamene iyo chifukwa chakuti yove enzelini Mwisiraeli. Koma Itai enena kuti: “Nulumbila mu zina ya Yehova Mulungu wamoyo komasoti mu zina yanu mwewo bwana wangu mfumu muli apa, kulikonse kwamungalute, nanesoti ntumiki wanu nizalute kwamene uko, ndipo nine wokonzeka olo kufwa namwe pamozi!”—2 Sam. 15:6, 18-21.
Itai enzewokhulupilika kuli Davide mfumu yosankhiwa na Yehova
Olo kuti Akereti, Apeleti, komasoti Ahiti enze ŵanthu antundu uyakine, ove enzeziŵa kuti Yehova ni Mulungu wachendi ndipo Davide ni wozozewa wake. N’vosakaikisha kuti Davide ekondwela ngako chifukwa chakuti analume amene awo enze okhulupilika ngako kuli yove!
a Mokatijana na lamulo yechipeleka Yehova pa Deuteronomo 23:3–6, Aamori na Amowabu enzelolewalini kuloŵa mumpingo wa Aisiraeli. Vuwoneka kuti lamulo yamene iyi yenzelesha tyala ŵanthu amitundu yamene iyi nkhala na ufulu wapadela monga kunkhala Mwisiraeli. Koma olo n’tetyo, mitundu yamene iyi yenzelolewa kuchita vinthu viyakine komasoti kunkhala pamozi na ŵanthu a Mulungu. Onani mutu wakuti “Amonitas” mu Estudo Perspicaz das Escrituras, Volume 1, pedji 95.
