Na o be o Tseba?
Ke ka baka la’ng banna bao e bego e se Baisiraele e ile ya ba madira a Kgoši Dafida?
BA BANGWE ba madira a Dafida bao e bego e se Baisiraele, e be e le banna ba bjalo ka Tseleke wa Moamoni, Uria wa Mohethe le Ithima wa Momoaba. a (1 Dikor. 11:39, 41, 46) Madira a mangwe a Dafida e be e le “Bakereta, Bapelethe le Bagathe.” (2 Sam. 15:18) Go bonala eka Bakereta le Bapelethe ba be ba tswalana le Bafilisita. (Hesek. 25:16) Go bonagala Bagathe ba etšwa seleteng sa Bafilisita motseng wa Gathe.—Josh. 13:2, 3; 1 Sam. 6:17, 18.
Ke ka baka la’ng Dafida a be a ka diriša banna bao e sego Baisiraele gore e be madira a gagwe? O be a kgodišegile gore ba tla mmotegela ba ba ba botegela Jehofa. Ka mohlala, ge The New Interpreter’s Dictionary of the Bible e bolela ka Bakereta le Bapelethe e re: “Ba ile ba botegela Dafida le dinakong tše thata ge a be a buša.” Ba dirile seo bjang? “Ge banna ka moka ba Isiraele” ba be ba tlogela Kgoši Dafida gomme ba latela “monna yo e sego wa selo, leina la gagwe e le Sheba,” Bakereta le Bapelethe ba ile ba dula ba botegela Dafida ba ba ba mo thuša gore a fenye borabele bja Sheba. (2 Sam. 20:1, 2, 7) Ka nako e nngwe morwa wa Kgoši Dafida yo a bitšwago Adonija o ile a leka go mo tšeela sedulo sa bogoši. Lega go le bjalo, Bakereta le Bapelethe ba ile ba dula ba botegela Dafida ba ba ba mo thuša go bea Solomone sedulong sa bogoši e lego yo Jehofa a mo kgethilego gore a hlatlame kgoši.—1 Dikg. 1:24-27, 38, 39
Motho yo mongwe yo e bego e se Moisiraele yo a ilego a botegela Dafida e be e le Itai wa Mogathe. Itai le madira a gagwe a 600 a ile a thekga Kgoši Dafida ge morwa wa gagwe Abesalomo a be a rabela kgahlanong le yena e bile a dira gore banna ba Isiraele ba be kgahlanong le kgoši. Dafida o ile a leka go botša Itai gore a tlogele go lwa ntweng yeo ka ge e be e se Moisiraele. Eupša Itai o ile a bolela gore: “Ke ikana ka Jehofa yo a phelago le ka kgoši mong wa ka yo a phelago gore kae le kae moo kgoši mong wa ka a tlago go ba gona, nna mohlanka wa gago ke tla ba gona e bile ke ikemišeditše go hwa le wena!”—2 Sam. 15:6, 18-21.
Itai o be a botegela Dafida, e lego kgoši ya Jehofa yeo e tloditšwego
Le ge Bakereta, Bapelethe le Bagathe e be e se Baisiraele, ba ile ba lemoga gore Jehofa ke Modimo wa therešo le gore Dafida o tloditšwe ke Jehofa gore e be kgoši. Dafida o swanetše go ba a ile a leboga kudu gore o na le banna ba botegago ka lehlakoreng la gagwe.
a Molao wa Modimo wo o ngwadilwego go Doiteronomio 23:3-6 o be o ganetša gore go se be le Moamoni goba Momoaba yo a tlago phuthegong ya Isiraele. Go bonala molao wo o be o thibela Baamoni le Bamoaba gore e be karolo ya setšhaba sa Modimo eupša o be o sa ba thibele gore ba dirišane goba go dula le setšhaba seo. Bala puku ya Insight on the Scriptures, Volume 1, letl. 95.
