Okuti Ankho Utyii-ale?
Oityi povita vya Ndaviti pakalelele naava vehe-va Isilayeli?
VAMWE povita vya Ndaviti vehe-va Isilayeli ankho tyati o Seleke omu Amoo, o Uliya omu Hete, na Itima omu Moambe. a (1 Ehi. 11:39, 41, 46) Ovakwavo ova “Keleta, nova Peletita, nova Ngate.” (2 Sam. 15:18) Ova Keleta nova Peletita ankho velii nova Filisitiya. (Isek. 25:16) Ova Ngate ankho vakala ko Filisitiya mepunda-umbo lyo Ngate. — Susu. 13:2, 3; 1 Sam. 6:17, 18.
Ndaviti wahonekesile ononthunda-vilongo vakale omafwalali ae. Omokonda yatyi? Omokonda ankho weveyumba umwe onthumbi utyii okuti vahula kwe no ku Siovaa. Ombimbiliya imwe yati: “Ova Keleta nova Peletita, kavayekele-po Ndaviti na tyina umwe tyepwiya.” Oityi tupopila ngootyo? Tupopia ngootyo mokonda pweetyi “ova Isilayeli vahongiliywa na Semba” avayeke-po okulandula Ohamba Ndaviti, ova Keleta nova Peletita kavayekele-po Ndaviti, avetyivili okulwisa Semba naava vahula kwe. (2 Sam. 20:1, 2, 7) Nthiki imwe, Andoniya omona wa Ndaviti ahande okunthintha outumini ku tate yae. Noopo ñgo, ova Keleta nova Peletita avahulu ku Ndaviti, avavialeka Salomau kouhamba una ankho wakoywa na Siovaa. — 1 Oha. 1:24-27, 38, 39.
Omukwavo wahayekele-po Ndaviti o Itai omu Ngate. Itai na vakwavo vena 600, wakwatesileko Ohamba Ndaviti etyi ova Isilayeli vahula komona wae Ambisalau. Potete Ndaviti apopila Itai ahaye kovilwa mokonda hamu Isilayeli-ko. Mahi Itai ati: “Na Siovaa umwe una omwenyo, noove umwe tatekulu Hamba una omwenyo, oku ove wamaende nako, oko ame muundapi wove mandyikakala, tyilinge tyindyetela ononkhia tyilinge tyimpha omwenyo!” — 2 Sam. 15:6, 18-21.
Itai kayekele-po Ndaviti, Ohamba yalembulwa na Siovaa.
Namphila ova Keleta nova Peletita, nova Ngate hava Isilayeli-ko, mahi ankho vetyii okuti Siovaa o Huku yotyotyili, ou Ndaviti, Omulembulwa wae. Ndaviti wapandulile unene ovalume ovo ovakwatyili ankho vahula kwe!
a Otyitumino tya Huku tyili m’Epalukununo 23:3-6, tyipopia okuti ova Amoo nova Moambe ankho kavapondola okukala pova Isilayeli. Otyitumino otyo katyipopi okuti ine omunthu wike vala omu Amoo ine omu Moambe kapondola okukala nova Isilayeli. Mahi tyipopia okuti elongo liatyo aliho kalipondola okukala pokati kova Isilayeli. Tala momukanda Estudo Perspicaz das Escrituras, Volume 1, pefo 114.
