EIHE rya Daudi rikaba ririmu abashaija abarwani abatari Baisraeli nka Zeleki Omuamoni, Huriya Omuhiiti, na Ituma Omumoabu. a (1 Bus. 11:​39, 41, 46) Kandi, eihe rye rikaba ririmu n’aba Keresi, aba Pelesi, n’aba Gaasi.” (2 Sam. 15:18) Aba Keresi n’aba Pelesi nibabaasa kuba baabaire baine obuzaare n’Abafilistia. (Ezk. 25:16) Aba Gaasi bakaba nibaruga omu rurembo rw’Abafilistia orwa Gaasi.—Yos. 13:​2, 3; 1 Sam. 6:​17, 18.

Ahabw’enki Omugabe Daudi yaikiriize abanyamahanga kuza omu ihe rye? Akaba naahamya ngu bamuhamiireho, kandi okukira munonga bahamiire ahari Yehova. Nk’eky’okureeberaho, kashoboorozi emwe ya Baibuli neegira ngu, aba Keresi, n’aba Pelesi, “bakaguma bahamiire ahari Daudi omu mbeera zigumire munonga omu bwire obu yaamazire naategyeka.” Bakakikora bata? “Abaisraeli boona” ku baatsigireho Omugabe Daudi, bakakuratira “omushaija otaine ku ari, orikwetwa Sheeba,” aba Keresi n’aba Pelesi bakaguma bahamiire ahari Daudi, kandi baamuhwera kurwanisa Sheeba. (2 Sam. 20:​1, 2, 7) Kandi, obu Adoniya mutabani w’Omugabe Daudi yaabaire naayenda kwegaruriza obugabe, aba Keresi n’aba Pelesi bakaguma bahamiire ahari Daudi, baayemeka Sulemaani nk’obugabe, ou Yehova yaabaire atooraine kuhungurira omugabe.—1 Bag. 1:​24-27, 38, 39.

Omunyamahanga ondiijo owaagumire ahamiire ahari Daudi ni Itaayi owa Gaasi. Itaayi n’abashaija be 600 abarwani bakashagika Omugabe Daudi obu omutabani Abusalomu yaamugomera, kandi akaiba emitima y’Abaisraeli. Omu kubanza, omugabe akagambira Itaayi ngu okurwana okwo tikurikumukwataho. Kwonka Itaayi akamugarukamu ati: “Nindahira [Yehova] otahwaho, na mukama wangye omugabe, ei mukama wangye omugabe ariza, yaaba kufa nari okugumaho, naanye omwiru waawe niyo ndiza.”—2 Sam. 15:​6, 18-21.

N’obu aba Keresi, aba Pelesi, n’aba Gaasi baabaire bari abanyamahanga, bakeetegyereza ngu Yehova niwe Ruhanga ow’amazima, kandi ngu akatoorana Daudi kuba omugabe. Daudi ka aine kuba yaashemereirwe munonga ahabw’okugira ngu abashaija abo bakamuhamiraho!